“Bayer Leverkuzen” klubunun baş məşqçisi vəzifəsinə Erik ten Haq gətirilib
Berlin, 26 may, AZƏRTAC
Almaniyanın “Bayer Leverkuzen” futbol klubunda baş məşqçi Xabi Alonsonun yerinə niderlandlı Erik ten Haq gətirilib.
AZƏRTAC xəbər verir ki, 55 yaşlı baş məşqçi ilə 2027-ci ilədək müddətə müqavilə imzalanıb.
Klubun idman direktoru Simon Rolfes imzalanma mərasimində Erik ten Haqın “Ayaks”da qazandığı altı titulun, həmçinin “Mançester Yunayted”də əldə etdiyi uğurların onun məşqçilik səviyyəsini sübut etdiyini deyib.
Baş məşqçi isə “Bayer Leverkuzen”in Almaniyanın və Avropanın ən yaxşı klublarından olduğunu qeyd edərək bildirib: “Mən Leverkuzendə son illərdə artan ambisiyaları təsdiqləmək üçün gəlmişəm. Bu keçid dövründə birlikdə iddialı komanda formalaşdırmaq bir nömrəli vəzifədir”.
Erik ten Haq məşqçilik karyerasına 2012-ci ildə “Go Ahead Eagles” klubunda başlayıb, 2013-2015-ci illərdə Almaniyanın “Bayern München II” komandasına rəhbərlik edib. 2015-2017-ci illərdə “Utrecht” klubunda uğurlu çıxışından sonra 2018-2022-ci illərdə “Ayaks” klubunun baş məşqçisi olub. Onun rəhbərliyi ilə “Ayaks” üç dəfə (2019, 2021, 2022) ölkə çempionu olub, xüsusilə 2018-2019-cu il mövsümündə UEFA Çempionlar Liqasının yarımfinalına qədər irəliləyib. 2022-2024-cü illərdə “Mançester Yunayted” klubunu çalışdıran baş məşqçi iki il əvvəl bu klubla İngiltərə Liqa Kubokuna sahib olub.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
