BAYRAM TƏDBİRİNDƏ UŞAQLARA GEYİM ƏŞYALARI HƏDİYYƏ OLUNMUŞDUR
“Tekfen” və “Akkord” şirkətlərinin maliyyə dəstəyi ilə keçirilən tədbirlərdə aztəminatlı ailələrdən 200-ə yaxın uşağın iştirak etdiyini diqqətə çatdıran RUT-un sədri, Milli Məclisin deputatı Gülər Əhmədova müqəddəs bayram münasibətilə uşaqları və onların ailə üzvlərini təbrik etmiş, onlara uzun ömür, xoşbəxt həyat arzulamışdır. Xalqımızın ümmmlili lideri Heydər Əliyevin uşaq və gənclərə olan diqqət və qayğısından söz açan Gülər Əhmədova demişdir ki, ulu öndərin layiqli davamçısı İlham Əliyev də bu yöndə xeyirxah işlər görür.
Dövlətin bu istiqamətdə apardığı uğurlu siyasət nəticəsində uşaq və gənclərin xoşbəxt, firavan yaşaması üçün yaradılmış şəraitdən danışan G.Əhmədova təşkilatın himayəsində olan minlərlə uşağın, eləcə də valideynlərin adından müqəddəs Ramazan bayramı münasibətilə Prezident İlham Əliyevə təbrik teleqramının göndəriləcəyini bildirmişdir.
On ildir ki, müxtəlif bayram günlərində imkansız, qaçqın və məcburi köçkün ailələrinə, kimsəsiz uşaqlara yardım göstərən təşkilat bu xeyriyyə tədbirlərində də uşaqlara geyim əşyaları hədiyyə etmişdir. Tanınmış müğənnilər şən mahnıları ilə uşaqlara sevincli anlar bəxş etmişlər.
