BƏRDƏDƏ İLİN YEKUNLARINA HƏSR OLUNMUŞ MÜŞAVİRƏ KEÇİRİLMİŞDİR
Müşavirədə rayon icra hakimiyyətinin başçısı Elman Allahverdiyev yola saldığımız ildə rayonun sosial-iqtisadi, ictimai-siyasi və mədəni həyatında qazanılan nailiyyətlər, qarşıya çıxan problemlər barədə məlumat vermişdir.
Qeyd olunmuşdur ki, ötən il Bərdədə 17 min 114 ton pambıq istehsal olunmuşdur ki, bu da əvvəlki ildəkindən 2 dəfə çoxdur. Hektarın məhsuldarlığı 6,1 sentnerdən 24,3 sentnerə çatdırılmışdır. 2005-ci ildə əkin sahəsi 2331 hektar artırılmış, 64 min ton tərəvəz, 45,4 min ton bostan məhsulları 5,1 min ton kartof, 1,9 min ton günəbaxan istehsal olunmuşdur. Taxılçılar rekord məhsul götürmüşlər. Hazırda rayonda 68,562 baş mal-qara, 128,588 baş qoyun-keçi bəslənilir. Ət, süd, yun, yumurta istehsalı əvvəlki illə müqayisədə xeyli artmışdır. Aqrar sahədə islahatların ikinci mərhələsi uğurla davam etdirilir. Rayonda süd emalı zavodu, 3 süd emalı sexi, 3 ət məhsullarının emalı və tədarükü sexi, 5 dəri qəbulu və emalı sexi, 3 kənddə aqroservis, 2 kənddə tərəvəz qəbulu məntəqəsi və konserv sexi və digər müəssisələr fəaliyyətə başlamışdır. Hesabat dövründə heyvandarlığın inkişafı üçün 18 təsərrüfata 550 milyon manat, bitkiçiliyin inkişafı üçün 15 təsərrüfata 364 milyon manat kredit verilmişdir.
Müşavirədə qeyd olunmuşdur ki, ötən il rayonda 20,7 milyard manatlıq sənaye məhsulalrı istehsal edilmiş və xidmətlər göstərilmişdir ki, bu da əvvəlki ildəkindən 5 faiz çoxdur. Son vaxtlar rayon ərazisində 27 səhmdar cəmiyyəti yaradılmış, 87 obyekt, 195 ədəd müxtəlif avadanlıq özəlləşdirilmişdir. Yeni yaradılmış “Bərdə-çınqıl”, “Qarabağ-pambıq”, “Bərdə-pendir” ASC-lərində yeni texnologiyaların tətbiqi nəticəsində istehsalın həcmi bir neçə dəfə artmışdır. Sahibkarlığın inkişafı üçün rayonda əlverişli şərait yaradılmışdır. Hesabat dövründə 68 fiziki və hüquqi şəxsə 1 milyard 909 milyon manat, 35 fiziki və hüquqi şəxsə kommersiya üçün 990 milyon manat, heyvandarlıq və əkinçiliyin inkişafı üçün 914 milyon manat kredit verilmişdir. Rayonda 33 min nəfərdən çox sahibkar fəaliyyət göstərir, ümumi daxili məhsul istehsalında qeyri-dövlət sektorunun xüsusi çəkisi 95,5 faiz təşkil edir.
2005-ci ildə rayonda pərakəndə əmtəə dövriyyəsinin həcmi 253,5 milyard manat təşkil etmiş, illik artım 17,8 faiz olmuşdur. Pərakəndə əmtəə dövriyyəsinin həcmi 283,3 milyard manat təşkil etmiş, əvvəlki ildəki göstərici 18,6 faiz artmışdır.
Müşavirədə qeyd olunmuşdur ki, ötən il əhaliyə göstərilən xidmətləri yaxşılaşdırmaq məqsədi ilə bir sıra tədbirlər görülmüş, rayona təbii qaz verilməyə başlamışdır. Bərdə şəhərində 4293 abonent təbii qazdan istifadə edir. Gələn il şəhərin bütünlüklə qazlaşdırılması nəzərdə tutulmuşdur.
Ötən il Heydər Əliyev Fondunun “Yeniləşən Azərbaycana yeni məktəb” proqramı çərçivəsində Saatlı və Yeni Daşkənd kəndlərində 240 yerlik, Xanağalı kəndində 200 yerlik yeni mktəb binaları tikilib istifadəyə verilmiş Məmmədli, Lənbəran və Xanqaraqoyunly kənd orta məktəblərində əsaslı, 20 məktəbdə cari təmir işləri aparılmışdır. Hazırda Bərdə şəhərində 280 yerlik yeni orta məktəb binası inşa olunur. Bir müddət əvvəl şəhərdə akademik Zərifə Əliyeva adına orta məktəb istifadəyə verilmişdir. Müşavirədə təhsilin inkişafına göstərdiyi diqqət və qayğıya görə Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyevaya dərin minnətdarlıq ifadə olunmuşdur.
2005-ci ildə rayonda 7 kənddə ambulatoriya, 8 kənddə tibb məntəqəsi istifadəyə verilmiş, 5 kənd xəstəxanasında, 9 həkim ambulatoriyasında təmir-bərpa işləri aparılmış, mərkəzi xəstəxananın nəzdində səhiyyə-informasiya mərkəzi yaradılmışdır.
Hesabat dövründə bütün maliyyə mənbələri hesabına rayon iqtisadiyyatnın inkişafına 20,4 milyard manat və ya əvvəlki ilin müvafiq dövrü ilə müqayisədə 2,6 dəfə çox investisiya yönəldilmiş, dövlət mülkiyyətinə 8,5 milyard manat, qeyri-dövlət mülkiyyətinə isə 17,9 milyard manat investisiya qoyulmuşdur. Abadlıq-quruculuq, tikinti işləri genişləndirilmiş, fərdi yaşayış binalarının tikintisinə 9,1 milyard manat vəsait xərclənmişdir. Şəhərin küçələrində 317 milyon manatlıq cari təmir işlər aparılmış, bu məqsədlə dövlət büdcəsindən ayrılmış 800 milyon manat vəsait hesabına ayrı-ayrı küçələrində səkiləri bərpa olunmuş yollara asfalt döşənmişdir. Tərtər çayı üzərində yeni körpü istifadəyə verilmişdir.
Müşavirədə qeyd olunmuşdur ki, ölkə prezidenti İlham Əliyevin tapşırığına əsasən rayonun abadlaşdırılması, yeni maşın və mexanizmlərin alınması üçün ötən il 3 milyard manat vəsait ayrılmışdır.
Müşavirədə bildirildi ki, şəhərin mərkəzində xalqımızın böyük oğlu, ümummilli liderimiz Heydər Əliyevin abidəsi ucaldılmış, “Heydər Əliyev muzeyi” inşa olunmuşdur.
Regionların sosial-iqtisadi inkişafı dövlət proqramının icrası ilə bağlı 2005-ci ildə 2761 yeni, o cümlədən 2296 daimi iş yeri açılmışdır.
Müzakirələrdə rayon maliyyə idarəsinin müdiri Zahid Məmmədov, təhsil şöbəsinin müdiri Rəhilə İsmayılova, mərkəzi xəstəxananın baş həkimi Etibar Mirzəyev, YAP rayon təşkilatının sədri İlham Ağayev, sahibkar Tofiq Kazımov, Qazıqurdalı bələdiyyəsinin sədri Vüqar Babayev və başqaları çıxış etmişlər.
Müşavirənin sonunda ölkə Prezidenti İlham Əliyevə müraciət qəbul olunmuşdur.
Müşavirənin işində daxili işlər naziri, general-polkovnik Ramil Usubov, Prezidentin İcra Aparatının məsul işçisi Nuriddin Hüseynov iştirak etmişlər.
Bölmənin digər xəbərləri
