BERLİNDƏ DÜNYA AZƏRBAYCANLILARININ HƏMRƏYLİK GÜNÜ MÜNASİBƏTİ İLƏ TƏDBİRLƏR KEÇİRİLMİŞDİR
Dekabrın 28-də Berlin, Drezden, Yena və Kölndən olan bir qrup azərbaycanlı bu əlamətdar günü qeyd etmək məqsədi ilə təşkilat komitəsi yaratmışdır. Təşkilat komitəsinin səfirliyin köməyi ilə birgə Berlindəki “Qala” şadlıq mərkəzində keçirdiyi tədbirdə 300-ə yaxın qonaq, o cümlədən Azərbaycan Respublikasından, İran və Türkiyədən olan soydaşlarımız, türk diasporunun nümayəndələri, Berlində təhsil alan azərbaycanlı tələbə və tədqiqatçılar iştirak etmişlər.
Dekabrın 30-da isə Azərbaycan Federasiyasının təşəbbüsü ilə Berlin Türk Evində keçirilən tədbirdə Milli Məclisin deputatı Gülər Əhmədova, Federasiyanın prezidenti Nüsrət Delbestə, Avropa Azərbaycanlıları Konqresi sədrinin müavini Murat Turan, habelə Türkiyənin Berlindəki Baş konsulu çıxış etmişlər. Natiqlər ümummilli liderimiz Heydər Əliyevin Azərbaycandan kənarda yaşayan soydaşlarımızın Vətənlə əlaqələrinin intensivləşdirilməsi, onların problemlərinə dövlət səviyyəsində qayğı göstərilməsi sahəsində tarixi fəaliyyətindən danışmışlar.
Diasporun dövlətçiliyimizin formalaşmasına verə biləcəyi töhfələr, Azərbaycanda 2005-ci ildə qazanılmış uğurlar, müxtəlif sahələrdə reallaşdırılan iri layihələr barədə də fikir mübadiləsi aparılmışdır.
Səfir Pərviz Şahbazov yola saldığımız ildə respublikamızın siyasi və iqtisadi həyatında baş vermiş mühüm hadisələri xatırlatmış, ölkə rəhbərliyinin yürütdüyü daxili və xarici siyasətin əsas istiqamətləri barədə danışmışdır. O, Prezident İlham Əliyevin əlamətdar gün münasibətilə müraciətini oxumuşdur.
Tədbirlərdə milli musiqimiz səsləndirilmiş, mətbəximizin nümunələri təqdim edilmişdir.
Bölmənin digər xəbərləri
