Beynəlxalq Əmək Konfransının sessiyasında Azərbaycanda aparılan sosial islahatlar barədə məlumat verilib
Bakı, 4 iyun, AZƏRTAC
Beynəlxalq Əmək Təşkilatına (BƏT) üzv ölkələrin hökumət nümayəndələri və sosial tərəfdaşların iştirakı ilə İsveçrənin Cenevrə şəhərində Beynəlxalq Əmək Konfransının 113-cü sessiyası keçirilir.
Sessiyada çıxış edən Azərbaycan nümayəndə heyətinin rəhbəri, əmək və əhalinin sosial müdafiəsi naziri Anar Əliyev diqqəti BƏT-in Baş direktoru Jilber Hunqbonun sessiyanın açılışındakı məruzəsinə yönəldərək onun süni intellektin inkişafı və ekoloji təhlükəsizlik kimi çağırışlar fonunda əmək sferasında baş verə biləcək dəyişikliklərə praqmatik yanaşmanın formalaşdırılmasına yeni imkanlar yaratdığını vurğulayıb.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən AZƏRTAC-a verilən məlumata görə, o, regional və qlobal səviyyədə baş verən siyasi və iqtisadi proseslərin mənfi təsirinə baxmayaraq, Azərbaycanda əhalinin sosial rifahının yüksəldilməsinin ölkədə həyata keçirilən güclü sosial dövlət konsepsiyasının əsasını təşkil etdiyini bildirib. Vurğulanıb ki, son illər ölkəmizdə 4 milyon vətəndaşı əhatə edən 5 böyük sosial islahat paketi icra olunub, minimum əməkhaqqı 3,1 dəfə, minimum pensiya 2,9 dəfə artırılıb. Orta aylıq pensiya və orta aylıq əməkhaqqında da əhəmiyyətli artımlar baş verib, müavinət və təqaüdlərə ayrılan vəsaitin həcmi 5 dəfə artırılıb.
Nazir Azərbaycanın 2019–2030-cu illər üzrə Məşğulluq Strategiyasının uğurlarını, aktiv məşğulluq tədbirlərinin genişləndirildiyini, məşğulluq xidmətlərinin yeni modelinin tətbiq edildiyini diqqətə çatdırıb. O, DOST konsepsiyasının üstünlükləri və uğurları barədə məlumat verib. Nazirliyin 159 xidmətindən 150-dən çoxunun tam elektronlaşdırıldığını, onlardan 60 xidmətin proaktiv təqdim olunduğunu, nazirlik üzrə elektronlaşma səviyyəsinin 95 faiz təşkil etdiyini bildirib. Ölkəmizdə sosial islahatlar prosesində sosial tərəfdaşların fəal iştirakını vurğulayan nazir bu sahədə qəbul olunan qərarların BƏT-in tripartizm prinsipi əsasında qiymətləndirilərək həyata keçirildiyini qeyd edib.
Bildirib ki, bu il aprelin 14-də BƏT-in Baş direktoru Jilber Hunqbonun respublikamıza səfəri və Azərbaycan Prezidenti İlham Əliyevlə görüşü ölkəmizin əmək və məşğulluq sahəsində beynəlxalq əməkdaşlığının yüksək səviyyəsinin təzahürüdür: “Azərbaycan hökuməti ilə BƏT arasında davamlı olaraq iki Layiqli Əmək üzrə Ölkə Proqramı uğurla icra olunub. Əminik ki, növbəti Proqram da tezliklə imzalanaraq əmək sferasında yeni çağırışlara birgə cavab verməyə xidmət edəcək”.
Azərbaycanın Dayanıqlı İnkişaf Məqsədlərinə uyğun olaraq İnsan İnkişafını gücləndirməyə sadiq olduğunu qeyd edən nazir ötən il Bakıda ən yüksək səviyyədə təşkil edilən COP29-da qlobal iqlim gündəliyi ilə bağlı mühüm qərarların qəbul edildiyini, COP29-un böyük uğurlara imza ataraq tarixə “Bakı sıçrayışı” kimi daxil olduğunu qeyd edib.
İşğaldan azad edilmiş bölgələrdə Böyük Qayıdış proqramının uğurlu icra olunduğunu vurğulayan Anar Əliyev bildirib ki, həmin ərazilərdə genişmiqyaslı bərpa və quruculuq işləri aparılır, layiqli məskunlaşma, məşğulluq və iqtisadi fəallıq təmin edilir.
Bölmənin digər xəbərləri
