Beynəlxalq koalisiyanın İrqadakı missiyasına son vermək barədə danışıqlar bərpa edilib
Bakı, 12 fevral, AZƏRTAC
Bağdad və Vaşinqton ABŞ-ın rəhbərlik etdiyi beynəlxalq koalisiyanın İraqdakı missiyasına son qoymaq üçün fevralın 11-də dialoqun yeni raunduna başlayıblar.
AZƏRTAC xəbər verir ki, bu barədə İraq hökuməti məlumat yayıb. İraq Silahlı Qüvvələri Baş komandanının rəsmi nümayəndəsi Yəhya Rəsulun sözlərinə görə, xüsusi komissiya ölkədəki hərbi vəziyyəti, İŞİD qruplaşmasının yaratdığı təhlükəni və ordunun imkanlarını qiymətləndirmək üçün beynəlxalq koalisiya ilə görüşləri bərpa edib.
Bu görüşlər əsasında İraqdakı beynəlxalq koalisiyanın müşavirlərinin sayının mərhələli şəkildə azaldılması üçün qrafik hazırlanacaq ki, bu da İŞİD ilə mübarizə üzrə missiyanın başa çatmasına gətirib çıxaracaq.
Xatırladaq ki, yanvarın 25-də Bağdad və Vaşinqton İraqda beynəlxalq koalisiyanın missiyasını başa çatdırmaq və münasibətləri siyasi, iqtisadi, mədəni və hərbi səviyyələrə keçirmək üçün Ali Hərbi Komissiya yaratmaq barədə razılığa gəlib.
Bölmənin digər xəbərləri
