SİYASƏT
Bişkek şəhərində ümummilli lider Heydər Əliyev adına parkın salınması layihəsi müzakirə edilib
Bişkek, 5 avqust (AZƏRTAC). Azərbaycanın Qırğızıstandakı səfiri Hidayət Orucov Bişkek şəhərinin meri Kubanıçbek Kulmatovla görüşüb.
Danışıqlar zamanı Bişkek şəhərində ümummilli lideri Heydər Əliyev adına parkın salınması layihəsi ətraflı müzakirə edilib.
Səfir hazırlanmış layihə ilə bağlı təkliflərini bildirərək qeyd edib ki, ulu öndər Heydər Əliyev Azərbaycan xalqının böyük oğlu olmaqla yanaşı, bütün türk dünyasının fəxridir. O, digər türkdilli ölkələrə və xalqlara öz xalqı kimi məhəbbət bəsləyirdi.
Diplomat bildirib ki, qardaş ölkə olan Qırğızıstanla Azərbaycan arasında bütün sahələrdə əməkdaşlığın genişlənməsi istiqamətində son vaxtlar çox iş görülsə də hələ mövcud potensialdan kifayət qədər istifadə edilməyib. O, ikitərəfli münasibətlərin inkişafının dövlət başçılarımızın maraq dairəsində olduğunu söyləyib.
H.Orucov bildirib ki, bu yaxınlarda Azərbaycan Respublikası və Qırğız Respublikası arasında yaradılmış Hökumətlərarası Birgə Əməkdaşlıq Komissiyanın ikinci iclasının keçirilməsi nəzərdə tutulub.
Səfir 2014-cü il oktyabr ayının 26-da “Azərbaycan Hava Yolları” Qapalı Səhmdar Cəmiyyəti tərəfindən Bakı-Bişkek-Bakı birbaşa aviareysinin ilk uçuşunun gerçəkləşəcəyini bildirib.
Mer birbaşa aviareysin açılmasının çox mühüm hadisə olduğunu bildirib. O, iki ölkə arasında əməkdaşlığın inkişafında səfirliyin aktiv fəaliyyətini yüksək qiymətləndirib.
Görüşdə qarşılıqlı maraq doğuran digər məsələlər müzakirə olunub.
Sonra səfir K.Kulmatovu Azərbaycana səfərə dəvət edib. Mer isə öz növbəsində dəvəti böyük məmnuniyyətlə qəbul edərək bildirib ki, Azərbaycan və qırğız xalqları qardaş xalqlardır və ölkələrimiz arasında münasibətlər daimi olaraq inkişaf etməkdədir.
Görüşdə Bişkek şəhərinin baş memarı Bakıtbek Abdiyev də iştirak edib.
Qulu Kəngərli
AZƏRTAC-ın xüsusi müxbiri
Bişkek