Bişkekdə MDB PA çərçivəsində Çingiz Aytmatovun 95 illiyinə həsr olunmuş tədbir keçirilib
Bakı, 17 noyabr, AZƏRTAC
Bişkekdə Azərbaycan Milli Məclisinin deputatlarının da iştirak etdiyi MDB Parlamentlərarası Assambleyasının payız sessiyası çərçivəsində görkəmli yazıçı Çingiz Aytmatovun anadan olmasının 95-ci illiyi münasibətilə beynəlxalq konfrans keçirilib.
AZƏRTAC “Kabar” informasiya agentliyinə istinadla xəbər verir ki, tədbiri açan Qırğız Respublikası Jokorqu Keneşinin sədri Nurlanbek Şakiyev görkəmli yazıçının ədəbi irsinin bütün Türk dünyası, habelə keçmiş sovet respublikaları xalqlarının ortaq sərvəti olduğunu bildirib. O əlavə edib ki, Çingiz Aytmatov öz dövrünün reallıqlarını incəliyi ilə hiss edən və onları əsərlərində təsvir edən böyük yazıçıdır. Onun “Bəşər övladı nə vaxt İnsan olacaq?” postulatı yüksək insani və əxlaqi dəyərlərin təzahürüdür.
Tədbirdə çıxış edən Qazaxıstan Parlamenti Senatının sədri Maulen Aşimbayev qeyd edib ki, Çingiz Aytmatovun əsərləri xalqlar arasında “qızıl körpü”dür və dahi ədib haqlı olaraq dünya ədəbiyyatı klassikləri arasında humanizm, insan mənəviyyatı və əxlaqının rəmzi kimi öz layiqli yerini tutub.
Rusiya Federasiyası federasiya Şurasının spikeri, MDB PA-nın sədri Valentina Matviyenko çıxışında bildirib ki, Çingiz Aytmatov XX əsr dünya ədəbiyyatında inqilab edib və fəlsəfi roman janrının dahi ustası kimi tarixdə qalıb. Görkəmli yazıçı xalqlar arasında dostluğun möhkəmləndirilməsi işinə böyük töhfə verib və onları sivilizasiyalar arasında dialoqa çağırıb.
Tədbirin sonunda MDB PA-nın qərarı ilə Çingiz Aytmatov adına mükafat onun yaradıcılığının tədqiqatçısı, akademik Abıldajan Akmataliyevə təqdim edilib.
Bölmənin digər xəbərləri
