Bişkekdə Xocalı faciəsinin 23-cü ildönümü qeyd olunub
Bişkek, 24 fevral, AZƏRTAC
Azərbaycanın Qırğızıstandakı səfirliyi bu ölkənin Milli Kitabxanasında “Xocalıya ədalət!” beynəlxalq təbliğat kampaniyası çərçivəsində Xocalı soyqırımının 23-cü ildönümü ilə bağlı anım mərasimi keçirib.
Mərasimdə Qırğızıstan Hökumətinin müxtəlif strukturlarının təmsilçiləri, parlament üzvləri, ölkədə akkreditə olunmuş diplomatik missiyaların, hüquq mühafizə təşkilatlarının, beynəlxalq qurumların təmsilçiləri, Azərbaycan diasporunun fəalları, ziyalılar, ictimaiyyət nümayəndələri, jurnalistlər iştirak ediblər.
Mərasimin əvvəlində iştirakçılar Xocalı faciəsini özündə əks etdirən foto və kitab sərgisinə baxıb, onlara məlumatlar toplusu paylanıb, Xocalı soyqırımı qurbanlarının ruhuna dualar oxunub.
Sonra soyqırımı qurbanlarının xatirəsi bir dəqiqəlik sükutla yad olunub, faciə haqqında sənədli film nümayiş etdirilib.
Qırğızıstan Milli Kitabxanasının direktoru, professor Jıldız Bakaşova xalqımıza başsağlığı verərək qeyd edib ki, Xocalı müsibəti hamımız üçün dözülməz ağrı və psixoloji sarsıntıdır. Direktor Ermənistan-Azərbaycan, Dağlıq Qarabağ probleminin ədalətli şəkildə həll olunmasının zəruriliyini vurğulayıb.
Azərbaycanın Qırğızıstandakı səfiri Hidayət Orucov Xocalı soyqırımı haqqında ətraflı məlumat verib, 1992-ci il fevral ayının 25-dən 26-na keçən gecə erməni işğalçı qüvvələrinin blokada şəraitində olan köməksiz bir şəhərə - Xocalıya ağır texnika, tank və iriçaplı silahlarla hücuma keçdiklərini bildirib. Səfir faciə zamanı həlak olanlarla bağlı konkret faktları göstərib, Xocalı soyqırımının yalnız Azərbaycan xalqına deyil, bütün bəşəriyyətə qarşı törədilmiş ağır cinayət olduğunu xatırladıb.
H.Orucov əminliklə bildirib ki, Azərbaycan Prezidenti İlham Əliyevin səriştəsi, uzaqgörən siyasəti sayəsində torpaqlarımız işğaldan azad ediləcək, işğalçılar layiqli cəzalarını alacaqlar.
Səfir qeyd edib ki, son illər Ermənistan və erməni diasporu dünya ictimaiyyətinin Ermənistan-Azərbaycan, Dağlıq Qarabağ problemi, Azərbaycanın işğal olunmuş torpaqları və məcburi köçkünləri haqqında fikrini başqa istiqamətə yönəltməyə çalışır. Şübhəsiz, Ermənistan və erməni diasporunun məqsədi 1905 və 1918-ci illərdə Azərbaycan türklərinə qarşı həyata keçirdikləri müsibəti və Xocalı soyqırımını gizlətməkdir.
Hidayət Orucov deyib ki, 2008-ci ildən başlayaraq Heydər Əliyev Fondunun vitse-prezidenti Leyla Əliyevanın təşəbbüsü ilə Xocalı soyqırımının dünya ictimaiyyətinə çatdırılması məqsədilə “Xocalıya ədalət!” adlı beynəlxalq kampaniya keçirilir. Heydər Əliyev Fondu Avropa, Asiya, Afrika, Şimali və Cənubi Amerikanın bir sıra ölkələrində Xocalı soyqırımı ilə bağlı tədbirlər keçirir.
Türkiyənin Qırğızıstandakı səfiri Mətin Kılıça qardaş Azərbaycan xalqına qarşı törədilmiş cinayətin təşkilatçılarının məsuliyyətə cəlb olunmasının vacibliyini qeyd edib.
Qırğızıstan parlamenti - Jokorku Keneşin deputatı, Qırğızıstan-Azərbaycan dostluq qrupunun rəhbəri Kurmanbek Dıykanbayev Xocalıda dinc əhalinin qəddarlıqla qətlə yetirilməsini pisləyib.
Bişkekdəki “Azəri” İctimai Birliyinin sədri Əziz Əliyev Qırğızıstanda yaşayan 20 minə yaxın azərbaycanlının adından Kurmanbek Dıykanbayevə müraciət edərək Qırğızıstan parlamenti tərəfindən Xocalı soyqırımının tanınması üçün məsələnin Joqorku Keneşdə müzakirə olunmasını xahiş edib.
“Sebat” tədris mərkəzinin direktoru Nurlan Kudayberdiyev, Qırğızıstanın əməkdar həkimi Akif Rəfibəyli, Müasir İnformasiya Texnologiyaları İnstitutunun müəllimi Anar Qasımov və təhsil işçisi Alla Qurbanova Xocalı soyqırımı və erməni təcavüzü haqqında danışıb. Bildirib ki, ermənilərin işğalçılıq siyasəti təkcə Azərbaycan deyil, bütün region üçün təhlükədir.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
