BMT Afrikada kütləvi aclıq təhlükəsinin qarşısının alınması ilə bağlı çağırış edib
Qahirə, 24 mart, AZƏRTAC
Birləşmiş Millətlər Təşkilatı (BMT) pandemiya dövründə Afrikanın 20 ölkəsində artan kütləvi aclıq təhlükəsinin qarşısını almağa çağırıb. Müraciətdə qeyd olunub ki, pandemiya ilə yanaşı, silahlı münaqişələr və iqlim dəyişikliyi qitədə milyonlarla insanın məhv olması ilə nəticələnə bilər.
AZƏRTAC xəbər verir ki, Dünya Ərzaq Proqramının (FAO) son məlumatında ən ağır vəziyyətin Cənubi Sudan və Nigeriyanın şimalında olduğu bildirilib. Ümumilikdə isə, dünyada 34 milyon insan aclıq təhlükəsi ilə qarşılaşıb. FAO-nun baş direktoru Qu Donqyu qeyd edib ki, BMT-nin xətti ilə Afrika ölkələrində ərzaq təhlükəsizliyi layihələri həyata keçirilir. Onun sözlərinə görə, bu səylər az sayda insanı aclıqdan xilas edə bilər, əhalinin böyük hissəsini ərzaqla təmin etmək üçün isə qlobal əməkdaşlığa ehtiyac var.
FAO bəyan edib ki, Afrikada əhalini aclıqdan xilas etmək üçün ən azı 5,5 milyard dollar vəsait lazımdır. Digər tərəfdən, kütləvi aclıq qitə ölkələrindən qanunsuz miqrasiyanı görünməmiş həddə çatdıra bilər.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
