Bolqarıstanın ABŞ-yə “Bezmer” aviabazasından istifadə etməyə icazə verməsi etirazla qarşılanıb
Sofiya, 23 iyul, AZƏRTAC
Bolqarıstan parlamentinin Amerika Birləşmiş Ştatlarına (ABŞ) məxsus hərbi aviasiyaya “Bezmer” aviabazasından istifadə etməyə icazə verməsi bölgədə narahatlığa səbəb olub. Bazanın yerləşdiyi Yambol vilayətinin bir sıra bələdiyyə rəhbərləri və yerli sakinlər qərara etiraz edərək aksiyalara hazırlaşırlar.
AZƏRTAC xəbər verir ki, bu barədə Rumıniyanın “Mediafax” agentliyi məlumat yayıb.
Bildirilib ki,parlamentin qəbul etdiyi qərara əsasən, iyulun 24-dən oktyabrın 1-dək ABŞ-nin Hərbi Hava Qüvvələrinə məxsus 8-dək KC-135 yanacaqdaşıyan təyyarənin, 250 hərbçinin və müvafiq texnikanın “Bezmer” aviabazasında yerləşdirilməsinə icazə verilib. Bu qüvvələrin Yaxın Şərqdə həyata keçirilən əməliyyatlara logistik dəstək verməsi nəzərdə tutulur.
Bolqarıstan hökuməti bəyan edib ki, ölkə ərazisindən heç bir döyüş əməliyyatı həyata keçirilməyəcək və aviabazada yalnız havada yanacaq doldurma missiyalarını dəstəkləyən logistika fəaliyyəti aparılacaq. Rəsmi Sofiya ABŞ-dən ölkənin milli təhlükəsizliyi ilə bağlı bütün zəruri təminatların alındığını bildirib.
Bununla yanaşı, “Bezmer” aviabazasının yerləşdiyi bölgədəki bir neçə bələdiyyənin rəhbəri təhlükəsizlik risklərinin artacağından narahat olduqlarını bildirərək, qərarın yenidən nəzərdən keçirilməsini tələb ediblər. Yerli sakinlər bazanın mümkün hədəfə çevrilə biləcəyini əsas gətirərək, etiraz aksiyaları keçirməyə hazırlaşırlar.
Qərar İranın Bolqarıstana ABŞ-nin hərbi təyyarələrinin ölkə ərazisində yerləşdirilməsinin regiondakı gərginliyi artıra biləcəyi barədə xəbərdarlığından sonra qəbul edilib. Buna baxmayaraq, Sofiya NATO qarşısında götürdüyü öhdəliklərə sadiq qaldığını və ABŞ ilə müdafiə sahəsində əməkdaşlığın davam etdiriləcəyini açıqlayıb.
Bölmənin digər xəbərləri
