Bolqarıstanın Sofiya Universitetinin tələbələri üçün “Azərbaycan multikulturalizmi” mövzusunda mühazirə təşkil olunub
Bakı, 23 dekabr, AZƏRTAC
Bolqarıstanın Müqəddəs Kliment Oxridski adına Sofiya Universitetinin tələbələri üçün mühazirə keçirilib. Bakı Beynəlxalq Multikulturalizm Mərkəzi (BBMM) və Sofiya Universitetinin Azərbaycan Mədəniyyəti və Dil Mərkəzinin təşkil etdiyi görüş “Azərbaycan multikulturalizmi” kursunu keçən universitet tələbələrinin istəyi ilə baş tutub.
Bakı Beynəlxalq Multikulturalizm Mərkəzinin mətbuat xidmətindən AZƏRTAC-a bildiriblər ki, “Azərbaycanın etnik müxtəlifliyi” mövzusuna həsr olunan mühazirəni Mərkəzin tədris şöbəsinin müdiri, dosent İrina Kunina təqdim edib.
Mühazirə maraqlı müzakirələrlə davam edib. Tələbələr bu qədər müxtəlif millətin birgə yaşadığı Azərbaycan cəmiyyətinin birləşdirici gücünün nədən ibarət olması ilə maraqlanıblar. Mövzu ilə bağlı çoxsaylı suallar səsləndirilib. Bəzi tələbələr Azərbaycanda yaşayan kiçik etnik qrupların tarixi, adət-ənənələri və adətləri haqqında daha çox məlumat əldə etmək istədiklərini bildiriblər. Bu maraq, ilk növbədə, “Azərbaycanın etnik müxtəlifliyi” mövzusunda tədqiqat işi yazmaq istəyi ilə əlaqələndirilib.
Xatırladaq ki, BBMM fəaliyyətə başladığı ilk dövrdən Azərbaycan multikulturalizmi modelinin təbliği, eləcə də xarici ölkə universitetlərində bir fənn kimi tədrisi layihəsini həyata keçirir. Hazırda dünyanın 20-dən artıq nüfuzlu universitetində “Azərbaycan multikulturalizmi” fənni uğurla tədris olunur.
Bölmənin digər xəbərləri
