Böyük Britaniyada miqrantlardan mobil telefonların müsadirəsinə dair yeni qaydalar qüvvəyə minib
London, 5 yanvar, AZƏRTAC
Böyük Britaniyada qanunsuz miqrantların həbs edilməsindən əvvəl onlardan mobil telefonların müsadirə olunmasına imkan verən yeni qaydalar qüvvəyə minib.
AZƏRTAC xəbər verir ki, bu addım Böyük Britaniyaya kiçik qayıqlarla keçidləri təşkil edən insan alveri şəbəkələri barədə kəşfiyyat məlumatlarının toplanmasına kömək edəcək.
Daxili İşlər Nazirliyinin açıqlamasına görə, telefonların müsadirəsinə bu gündən etibarən Kent qraflığında yerləşən Manston miqrantların emal mərkəzində başlanacaq. Mərkəzdə cihazlardan məlumatların yüklənməsi üçün texniki imkanlar artıq hazırdır. Yeni qaydalara əsasən, əməkdaşlar miqrantlardan üzərlərində olan telefonları tapmaq üçün paltolarını çıxarmalarını tələb edə, həmçinin SIM kartların gizlədilib-gizlədilmədiyini yoxlamaq məqsədilə ağız boşluğunu da yoxlaya biləcəklər.
Milli Cinayət Agentliyi toplanacaq məlumatların insan alveri ilə məşğul olan dəstələrə qarşı aparılan araşdırmaları sürətləndirə biləcəyini bildirib. Qaçqınlar Şurası isə yeni səlahiyyətlərin proporsional şəkildə tətbiq edilməsinin vacibliyini vurğulayıb. Qurum qeyd edib ki, mobil telefonlar həssas vəziyyətdə olan insanlar üçün ailələri ilə əlaqədə qalmaq baxımından həyati əhəmiyyət daşıyır.
Miqrasiya və vətəndaşlıq üzrə nazir Mayk Tapp bildirib ki, müsadirə edilmiş telefonlar sonradan geri qaytarıla bilər, lakin bu, konkret hallar və telefonda aşkar olunan məlumatlardan asılı olacaq. Onun sözlərinə görə, bu qərarı yerində çalışan əməkdaşlar verəcək.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
