Böyük Britaniyanın müxtəlif bölgələrində qütb işıqları müşahidə olunub
London, 2 sentyabr, AZƏRTAC
Böyük Britaniyada bu il payız mövsümündə ilk dəfə qütb işıqları (aurora borealis) səmada parıldayıb.
AZƏRTAC BBC-yə istinadla xəbər verir ki, hadisə sentyabrın 1-də gecə saatlarında baş verib və ölkənin bir çox bölgəsindən, o cümlədən Şotlandiyanın şimalından, Uelsdən, Norfolk və Kentdən izlənilib.
Alimlər bunun Günəş aktivliyi nəticəsində Günəş səthində baş verən partlayış - koronal kütlə atılması nəticəsində yarandığını bildiriblər. Belə ki, Günəşdən ayrılan yüksək enerjili hissəciklərin Yer kürəsinin atmosferinə daxil olaraq oksigen və azotun təsirinə məruz qalması nəticəsində yaşıl, bənövşəyi və qırmızı rəngli işıqlar səmada əks olunub.
Böyük Britaniya Meteorologiya Xidmətinin Kosmik Hava Mərkəzi isə proqnozlaşdırır ki, Günəşdəki aktivlik çərşənbə axşamı gecəsinə qədər davam edə bilər, hətta G4 - güclü maqnit qasırğası səviyyəsinə yüksəlmə ehtimalı var.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
