Böyük Qayıdışı yaxınlaşdıran yollar FOTO
Ağdam, 24 mart, Tahir Ağaməmmədov, AZƏRTAC
Azərbaycanın işğaldan azad edilən ərazilərində bir sıra infrastruktur layihələri həyata keçirilir. Belə layihələr arasında yol infrastrukturunun yenidən qurulması xüsusi əhəmiyyət kəsb edir.
AZƏRTAC-ın bölgə müxbiri xəbər verir ki, işğaldan azad edilmiş ərazilərdə yolların yenidən qurulması işlərinə ilkin olaraq Tərtər rayonundan başlanılıb. Azərbaycan Prezidentinin tapşırığına əsasən, Tərtər şəhərindən Suqovuşana, Suqovuşandan Talış kəndinədək yol yenidən qurulub. Bundan başqa Füzulidən Şuşaya və Göygölün Toğanalı kəndindən Murovdağ silsiləsini keçməklə Kəlbəcər-İstisu istiqamətində yeni avtomobil yollarının tikintisi həyata keçirilir. Bərdə-Ağdam dəmir yolu xətti yenidən qurulur. Təməli Prezident İlham Əliyev tərəfindən qoyulmuş Horadiz-Ağbənd dəmir yolu xəttinin strateji əhəmiyyəti xüsusilə böyükdür. Belə ki, bu nəqliyyat infrastrukturu Azərbaycan vətəndaşlarının azad olunmuş torpaqlara gediş-gəlişinin təminatında əhəmiyyətli rol oynamaqla yanaşı Azərbaycanın əsas hissəsi ilə Naxçıvan Muxtar Respublikası arasında birbaşa dəmir yolu nəqliyyat əlaqəsinin yaranmasına böyük töhfə verəcək.
Bu günlərdə Prezident İlham Əliyev daha bir əhəmiyyətli yolun - Füzuli-Hadrut avtomobil yolunun təməlini qoydu. Füzuli-Hadrut avtomobil yolu başlanğıcını "Zəfər yolu" adlandırılan Füzuli-Şuşa yolundan götürür və yeni inşa ediləcək Hadrut-Cəbrayıl-Şükürbəyli avtomobil yoluna birləşir. Uzunluğu 13 kilometr olacaq bu yolda dörd hərəkət zolağı salınacaq, körpülər inşa ediləcək. Bu yolun inşası başa çatdıqdan sonra ətrafdakı şəhər və qəsəbələr müasir standratlara uyğun bərpa oluncaq. Füzuli-Hadrut avtomobil yolu, eyni zamanda, bölgənin turizm imkanlarını da artıracaq.
Prezident İlham Əliyev Füzuli-Hadrut avtomobil yolunun təməlqoyması zamanı bildirib ki, Bərdə-Ağdam yolunun çəkilişi də yaxın gələcəkdə icra ediləcəkdir. Bundan başqa Horadizdən Zəngilana qədər yol çəkiləcək.
Qeyd etdiyimiz və gələcəkdə reallaşdırılacaq digər nəqliyyat infrastrukturu layihələri işğaldan azad edilmiş ərazilərimizin bərpası, regionun sosial-iqtisadi inkişafı üçün böyük əhəmiyyət daşıyır. Müharibədən dörd ay keçməsinə baxmayaraq, artıq böyük quruculuq işlərinə start verilib və bu işlərin təməli məhz yol infrastrukturu ilə qoyulub.
Xatırladaq ki, Azərbaycan ordusunun 2016-cı il Aprel döyüşlərindəki zəfərindən sonra dövlətimizin başçısının sərəncamlarına əsasən Cocuq Mərcanlı kəndi və Horadiz şəhərindən Cocuq Mərcanlıya gedən 9 kilometr uzunluğunda yol qısa bir zamanda yenidən quruldu. O zaman Cocuq Mərcanlıya gedən yolun yenidən qurulması Qarabağda ilk qələbə yolunun açılması, həmin yolla kənd əhalisinin yenidən doğma yurda qayıtması Qarabağa qayıdışın başlanğıcı kimi dəyərləndirilmişdi. Məcburi köçkünlərin beş il əvvəl Cocuq Mərcanlıdan başlayan böyük qayıdışı tezliklə yeni inşa edilən yollarla işğaldan azad edilmiş bütün şəhər və kəndlərimizə gerçəkləşəcəkdir.
Bölmənin digər xəbərləri
