Braziliyada Amazon meşələrinin qırılması artıb
Bakı, 9 avqust, AZƏRTAC
İyul ayında Braziliyadakı Amazon meşələrinin qırılması 15 aylıq fasilədən sonra yenidən artıb.
AZƏRTAC xəbər verir ki, Braziliyanın Ətraf Mühit və Elm Nazirliyinin məlumatına görə, iyul ayında təxminən 666 kvadrat kilometr sahədə meşələrin qırılması işləri aparılıb ki, bu da ötən ilin eyni ayı ilə müqayisədə 33 faiz çoxdur.
Meşələrin qırılmasının artması ətraf mühit işçilərinin iyun ayında başlayan tətili ilə qismən əlaqədardır. Ətraf mühit işçilərinin “Ascema” həmkarlar ittifaqının lideri Uolles Lopez bildirib ki, meşə mühafizəsi işçilərinin tətili bu sahədə qanunların icrasına mənfi təsir göstərib.
Artım tempinə baxmayaraq, hazırkı Prezident Luis da Silvanın hakimiyyəti zamanı Amazonda meşələrin qırılma sürəti onun sələfi Jair Bolsonaronun dövründə olduğundan xeyli aşağıdır.
2022-ci ilin iyul ayında, Bolsonaronun vəzifədə olduğu son ildə Amazonda meşələrin qırılması 2024-cü ilin iyul ayında olduğundan iki dəfə çox olub. Bu barədə dövlət kosmik tədqiqat agentliyi “Inpe” məlumat yayıb.
2023-cü ilin yanvarında vəzifəyə gələn Luis da Silva sələfi Bolsonaronun dövründə meşələrin qırılmasının artması fonunda söz verib ki, 2030-cu ilə qədər bu mənfi tendensiyaya son qoyulacaq. Bu öhdəlik onun Braziliyanın iqlim profilini bərpa etmək cəhdinin əsasını təşkil edir, çünki Amazon meşələri böyük miqdarda istixana qazlarını udur.
Bölmənin digər xəbərləri
