Britaniyada nüvə tullantıları zavodundan gündə 2,1 min litr çirklənmiş su sızır
London, 23 oktyabr, AZƏRTAC
Britaniyanın Kumbriya bölgəsində dağılmaq üzrə olan nüvə tullantıları zavodundan hər gün yerə minlərlə litr çirkli su sızır.
AZƏRTAC xəbər verir ki, bu barədə İngiltərənin dövlət xərc nəzarət qurumu tərəfindən yayımlanan hesabatda xəbərdarlıq edilib. Avropanın ən böyük nüvə sahələrindən biri olan “Magnox Swarf Storage Silo” binası ən təhlükəli binalardan biri hesab olunur və oradakı tullantıların daha təhlükəsiz və müasir obyektlərə köçürülməsi istiqamətində işlər aparılır.
Lakin çərşənbə günü dərc olunan hesabatda ləng irəliləyiş səbəbindən işlərin təxminən 2050-ci illərin sonuna qədər uzanacağı və bunun əhəmiyyətli təhlükəsizlik və maliyyə nəticələri doğuracağı bildirilib. Milli Audit Ofisi (NAO) bildirib ki, 2019-cu ildə binada sızma baş verib və hazırda hər gün təxminən 2 min 100 litr çirkli su yerə axır. Lakin binaya girmək təhlükəli olduğu üçün mühəndislər sızmanı düzəldə bilmir və hətta dəqiq səbəbini müəyyən etməkdə çətinlik çəkirlər. Bu o deməkdir ki, sızmanın daha 30 il davam etməsi gözlənilir.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
