BRİTANİYALILARI MÜSƏLMANLARLA DOSTLAŞDIRACAQLAR
Yeni idarə rəsmən belə adlanır: “Cəmiyyətin müxtəlif etnik və dini qruplarının qarşılıqlı əlaqələrini öyrənmək üçün inteqrasiya və birləşmə komissiyası”. Onun yaradıldığını Böyük Britaniyanın icma və yerli özünüidarə işləri naziri xanım Rut Kelli bildirmişdir.
Bu qurumun yaradılması zərurəti, ilk növbədə, müsəlman icmasına qarşı yönəldilmiş seqreqasiya əhval-ruhiyyəsinin Britaniya cəmiyyətində yenidən güclənməsi nəticəsində meydana gəlmişdir. Bu onunla bağlıdır ki, keçən ilin iyulunda Londonda partlayışlar törətmiş terrorçular da, bu il sərnişin təyyarələrində terror sui-qəsdi hazırlamaqda şübhəli bilinərək həbsə alınanlar da Böyük Britaniyada doğulub yaşayan müsəlmanlardır.
Nazirin sözlərinə görə, komissiya “boşboğazlıqla” məşğul olmayacaq və son illər Britaniya hökumətinin nəzərə çarpdırdığı “islamın təhrif edilmiş formalarının” ideologiyası ilə mübarizə aparacaqdır. O demişdir ki, komissiyanın fəaliyyətindən məqsəd ziddiyyətlərin necə yarandığını və bununla mübarizə aparmaq üçün yerli icmaların nə kimi əməli tədbirlər gördüyünü öyrənmək və vəziyyəti dəyişdirməyə çalışmaqdır.
13 ekspertdən ibarət komissiya sentyabrda fəaliyyətə başlayacaq və gələn ilin iyun ayınadək yekun məruzəsi və tövsiyələr hazırlamaq üçün Birləşmiş Krallığın müxtəlif şəhərlərində işləyəcəkdir.
Bölmənin digər xəbərləri
