Bu gün dənizçilərin peşə bayramıdır
Bakı, 25 iyun, AZƏRTAC
Hər il iyunun 25-i dənizçilərin günü kimi qeyd olunur.
AZƏRTAC xəbər verir ki, iyunun 25-i dünyada Beynəlxalq Dənizçi Günüdür. Ölkəmizdə isə bu gün həm də “Dənizçi günü” peşə bayramı kimi qeyd edilir.
Beynəlxalq Dənizçi Günü Birləşmiş Millətlər Təşkilatının (BMT) beynəlxalq günlər sistemində Beynəlxalq Dəniz Təşkilatının təşəbbüsü ilə qeyd olunur. Bu günün qeyd edilməsi haqqında qərar təşkilata üzv dövlətlər tərəfindən 2010-cu ildə Filippinin paytaxtı Manilada keçirilən konfransda qəbul olunub. Bütün dənizçilik peşələrinin nümayəndələri üçün xüsusi günün təsis edilməsi onların beynəlxalq ticarətin, dünya iqtisadiyyatının və bütövlükdə vətəndaş cəmiyyətinin inkişafına əvəzsiz töhfələrinə görə zəruri hesab olunub.
Beynəlxalq Dənizçi Gününün bu il üçün mövzusu “Dünya ticarətini də, riskləri də daşıyırlar”dır. Bu mövzu xatırladır ki, dənizçilər heç vaxt geosiyasi münaqişələrin qurbanı və ya aləti olmamalıdır. Hökumətlər və sənaye sektoru əmək standartlarını qorumaq, beynəlxalq hüquqa hörmət etmək və bütün dənizçilərin təhlükəsizliyini təmin etməklə onları dəstəkləmək və müdafiə etmək məsuliyyətini daşıyır.
BMT-nin Baş katibi Antonio Quterreşin bu əlamətdar gün münasibətilə müraciətində deyilir: “Bütün malların və məhsulların — qidadan dərmanlara, enerjidən digər zəruri ehtiyaclara qədər demək olar ki, 90 faizi bizə dəniz yolu ilə çatdırılır. Lakin dövlətlər arasında qarşıdurmalar baş verdikdə dənizçilər çox vaxt hadisələrin ortasında qalırlar. Hörmüz boğazında baş verən son hadisələr nəticəsində on minlərlə dənizçi dünyanı yanacaq və ərzaqla təmin etmək üçün vətənlərindən uzaqda çalışarkən çətin vəziyyətə düşüblər. Quruda yaşayan insanların çoxu dənizin və dəniz daşımalarının həyati əhəmiyyətini yalnız böhran zamanı anlayır. Bu səbəbdən onları bəzən “dəniz korluğu” yaşayan insanlar adlandırırlar. Gəlin, dənizçilərin cəsarətini və peşəkarlığını ehtiramla yad edək və bütün fırtınalara sinə gərmələri üçün onların yanında olaq”,
Beynəlxalq Dəniz Təşkilatının baş katibi Arsenio Dominquezin müraciətində isə diqqətə çatdırılıb ki, hər gün milyonlarla dənizçi qlobal ticarətin fasiləsiz olmasını təmin edir: “Süfrəmizdəki qida məhsulları, iqtisadiyyatlarımızı hərəkətə gətirən enerji, xəstəxanalara çatdırılan dərmanlar və gündəlik həyatımızı dəstəkləyən saysız-hesabsız məhsullar dənizdə çalışan insanların fədakar əməyindən asılıdır. Onların qlobal iqtisadiyyata verdikləri töhfə əvəzsizdir, lakin bu zəhmət çox vaxt görünməz qalır. Bu il qeyd olunan Beynəlxalq Dənizçilər Günü bir çox dənizçinin hələ də yüksək təhlükəsizlik riskləri və qeyri-müəyyənlik şəraitində fəaliyyət göstərdiyi bir dövrə təsadüf edir. Son hadisələr gərginliyin azalacağına ümid versə də, çoxsaylı ekipaj üzvləri hələ də təsirlənmiş bölgələrdə xidmət göstərir, çətin şəraitdə öz vəzifələrini peşəkarlıqla və dözümlülüklə yerinə yetirməyə davam edirlər. Dənizçilik ictimaiyyəti daha sabit gələcəyə doğru irəliləyərkən qlobal gəmiçiliyin arxasında duran insanları unutmamaq vacibdir. Onların təhlükəsizliyi, rifahı və ləyaqəti həm dənizçilik sənayesinin, həm də beynəlxalq gəmiçilik ictimaiyyətinin ortaq prioriteti olaraq qalmalıdır”.
Dünya ölkələrində olduğu kimi, Azərbaycanda da dənizçilik peşəsinə və dənizçilərin fəaliyyətinə yüksək dəyər verilir. Ölkəmizdə “Dənizçi günü” peşə bayramı Prezident İlham Əliyevin 19 iyun 2014-cü il tarixli Sərəncamı ilə elan olunub.
Azərbaycanda gəmiçiliyin qədim tarixi var. Sovet İttifaqı dövründə Ümummilli Lider Heydər Əliyev respublikamızda bu sahənin inkişafına xüsusi diqqət və qayğı göstərib. Müstəqillik illərində də bu mühüm sahə, Xəzər donanması məhz Ulu Öndərin sayəsində qorunub saxlanılıb, dəniz nəqliyyatı sektorunda əsaslı islahatlar həyata keçirilib. Ümummilli Liderin kursunu uğurla davam etdirən Prezident İlham Əliyevin tapşırıq və tövsiyələri əsasında dəniz limanlarının, habelə Gəmiqayırma zavodu, gəmi təmiri müəssisələrinin işi daha da təkmilləşdirilib.
Prezident İlham Əliyev 2018-ci il mayın 14-də paytaxtın Qaradağ rayonunun Ələt qəsəbəsində Bakı Beynəlxalq Dəniz Ticarət Limanı Kompleksinin açılışında iştirak edib. Dövlətimizin başçısının uzaqgörən siyasəti nəticəsində bu mühüm obyekt hazırda qlobal miqyasda aktual olan Orta Dəhlizin ən mühüm komponentlərindən birinə çevrilib.
Müxbir - Nailə Həsənova
Bölmənin digər xəbərləri
