Bu il Astarada 300 hektar sahədə çəltik əkini nəzərdə tutulur
Astara, 5 mart, Bağır Əliyev, AZƏRTAC
Çəltikçilik Astara rayonunda kənd təsərrüfatının ən perspektivli sahələrindən biridir. Rayon üzrə ümumi taxıl əkinlərinin təxminən üçdəiki hissəsi çəltik əkinlərinin payına düşür.
Astara Rayon Statistika İdarəsindən AZƏRTAC-ın bölgə müxbirinə verilən məlumata görə, ötən il rayonda 237 hektar sahədən 997 ton çəltik yığılıb. Hər hektardan götürülən məhsuldarlıq 42,1 sentner təşkil edib.
Bu il isə rayonda 300 hektar sahədə çəltik əkilməsi və 1300 tona yaxın məhsulun istehsalı nəzərdə tutulub.
Qeyd edək ki, son illər Astara rayonunda ənənəvi əkin sahələrinin, o cümlədən çəltikçiliyin inkişafına diqqət artırılıb. Rayonda əvvəllər kənd təsərrüfatının əsas sahəsi olan çəltikçilik ötən əsrin 60-cı illərində həmin dövr üçün daha səmərəli hesab olunan sitrus meyvələri, çay və tərəvəz əkini ilə əvəz edilib.
Rayonda çəltikçilik yenidən dirçəlməyə başlayıb. Azərbaycan Respublikasında çəltikçiliyin inkişafına dair 2018-2025-ci illər üçün Dövlət Proqramı ölkəmizdə, o cümlədən Astara rayonunda çəltikçiliyin inkişafına geniş imkanlar açıb. Dövlət tərəfindən çəltik əkininə görə məhsul istehsalçılarına hər hektar üçün 80 manat subsidiyanın ayrılması fermerlərin və torpaq mülkiyyətçilərinin bu sahəyə marağını daha da artırıb.
Bölmənin digər xəbərləri
