BUXARESTDƏ HEYDƏR ƏLİYEV ADINA PARKIN AÇILIŞI
AZƏRTAC-ın xüsusi müxbiri xəbər verir ki, sentyabrın 24-də Buxarestdəki Azərbaycan xalqının ümummilli lideri Heydər Əliyevin adını daşıyan parkın açılışı olmuşdur. Açılış mərasimində Azərbaycan Prezidenti İlham Əliyev, Rumıniya Prezidenti Trayan Besesku və onların xanımları iştirak etmişlər.
2004-cü ilin oktyabrında burada zəmanəmizin görkəmli siyasi xadimi Heydər Əliyevin büstünün açılışı olmuşdur. Əlamətdar haldır ki, 1989-cu il inqilabından sonra Rumıniyada xarici ölkələrin siyasi xadimlərindən yalnız 3 nəfərin Şarl de Qoll, Mustafa Kamal Atatürk və Heydər Əliyevin abidələri qoyulmuşdur.
Bu ilin mart ayında parkda başlanmış yenidənqurma işləri avqust ayında başa çatdırılmışdır. Burada “Heydər Əliyev Azərbaycan xalqının ümummilli lideridir” xatirə kompleksi, üç uşaq meydançası, bir idman meydançası yaradılmışdır. İtibucaqlı ulduz şəklində olan mərkəzi fəvvarənin dövrəsində altı musiqili fəvvarə quraşdırılmışdır. Parkda fasiləsiz olaraq Azərbaycan və rumın xalq musiqisi səslənir. Parkın hasarının üzlənməsində Azərbaycan və rumın milli naxışlarından ibarət metal pannodan istifadə edilmişdir. Əsas giriş qapısı Azərbaycan milli memarlıq üslubunda - şəbəkəli tağ formasında düzəldilmişdir.
Parkda yenidənqurma işləri aparılarkən yaşıllaşdırmaya xüsusi diqqət yetirilmişdir. Burada təxminən 30 min çiçək, beş min kol əkilmiş, sahəsi 4 hektardan çox olan çəmənlik salınmışdır. Parkın bütün mərkəzi hissəsinə qranit plitələr döşənmişdir. Burada 100 oturacaq yeri olan amfiteatr vardır.
Parkın girəcəyində Azərbaycan Prezidenti İlham Əliyevi, Ruminya Prezidenti Trayan Beseskunu və onların xanımlarını Buxarestin ikinci sektorunun meri Nekulay Onsamu və Rumıniya-Azərbaycan Dostluq Cəmiyyətinin sədri İoan Pop de Popa qarşıladılar.
Mərasimdə çıxış edən Nekulay Onsamu dövlət başçılarını salamlayaraq dedi ki, Buxarestdə Heydər Əliyev parkının açılması Azərbaycan-Rumıniya əlaqələrinin inkişafının parlaq təzahürüdür.
Rumıniya-Azərbaycan Dostluq Cəmiyyətinin sədri İoan Pop de Popa vurğuladı ki, Heydər Əliyev Rumıniyanın dostu idi, o, iki ölkənin strateji tərəfdaşlıq münasibətlərinin təməlini qoymuşdur. O, Bakıda görkəmli rumın bəstəkarı Corc Eneskuya abidə ucaldılmasına görə Prezident İlham Əliyevə təşəkkür etdi.
Rumıniya Prezidenti Trayan Besesku çıxışında bildirdi ki, Buxarestdə Heydər Əliyev Fondunun nümayəndəliyinin və Azərbaycan xalqının ümummilli liderinin adını daşıyan parkın açılması Azərbaycan və Rumıniya xalqları arasında dostluq münasibətlərinə əyani sübutdur. O dedi ki, Xəzər və Qara dəniz regionlarında təhlükəsizlik və sülh zonası yaradılması üçün hər iki ölkə çox səy göstərir. Rumıniya beynəlxalq hüququn dövlətlərin ərazi bütövlüyü və sərhədlərin toxunulmazlığı kimi prinsiplərinə riayət edilməsinə xüsusi əhəmiyyət verir.
Prezident İlham Əliyev mərasim iştirakçılarını Azərbaycan-Rumıniya münasibətlərinin tarixində əlamətdar gün - bütün həyatını öz xalqına xidmətə həsr etmiş Heydər Əliyevin adını daşıyan parkın açılışı münasibətilə təbrik etdi. O bildirdi ki, ümummilli liderin rəhbərliyi altında Azərbaycanın müstəqilliyi möhkəmlənmişdir və indi ölkəmiz sürətlə inkişaf edir.
Dövlətimizin başçısı Azərbaycan-Rumıniya münasibətlərinin genişlənməsindən bəhs edərək dedi ki, Rumıniya Azərbaycanın müstəqilliyini tanımış ölkələrin sırasında ikincidir. O, Azərbaycanın Avratlantik strukturlarına inteqrasiya səylərinin, Ermənistan-Azərbaycan, Dağlıq Qarabağ münaqişəsində ölkəmizin ədalətli mövqeyinin dəstəklənməsinə görə Rumıniya rəhbərliyinə təşəkkürünü bildirdi. Prezident İlham Əliyev vurğuladı ki, ölkələrimiz arasında siyasi və iqtisadi sahələrdə əməkdaşlıq kimi, humanitar sahədə əlaqələr də fəal inkişaf edir. Bakıda rumın bəstəkarı Corc Eneskuya abidə ucaldılması və Buxarestdə Heydər Əliyev parkının açılışı buna əyani sübutdur. Azərbaycan dövlətinin başçısı əmin olduğunu bildirdi ki, dost Rumıniya ilə Azərbaycanın əlaqələri daha da genişlənəcəkdir.
Azərbaycan və Rumıniya prezidentləri və onların xanımları Heydər Əliyevin büstü önünə gül qoydular.
Sonra dövlət başçıları parkı gəzdilər, Tei gölünün əsrarəngiz panoramına tamaşa etdilər.
Gəzinti zamanı Buxarest Texniki Universitetinin Heydər Əliyev təqaüdçüləri olan azərbaycanlı tələbələr Prezident İlham Əliyevə yaxınlaşaraq, ona minnətdarlıqlarını bildirdilər. Buxarestin türk və tatar diasporlarının nümayəndələri Azərbaycan Prezidentinə üzərində aşağıdakı sözlər yazılmış plaket təqdim etdilər: “Azərbaycan türklərinin, bütün türk dünyasının lideri mərhum Heydər Əliyevin xatirəsinə ehtiram əlaməti olaraq bu abidənin ucaldılmasına və bu parkın açılışına görə Sizə təşəkkürümüzü bildiririk”.
Sonra parkda Azərbaycan və rumın artistlərinin iştirakı ilə konsert oldu.
Bölmənin digər xəbərləri
