İQTİSADİYYAT
Cari ilin sentyabrında Enerji Məsələlərini Tənzimləmə Agentliyinə 1898 vətəndaş müraciət edib
Bakı, 9 oktyabr, AZƏRTAC
Cari ilin sentyabr ayı üzrə istehlakçıların hüquqlarının qorunması, abonentlərin elektrik və istilik enerjisi, təbii qazla təchizatı və digər məsələlərlə bağlı Azərbaycan Enerji Məsələlərini Tənzimləmə Agentliyinə (AERA) bilavasitə və Energetika Nazirliyindən 1898 müraciət daxil olub.
AERA-dan AZƏRTAC-a bildirilib ki, elektrik enerjisi təchizatı ilə bağlı 158-i məlumat üçün olmaqla cəmi 1679, təbii qaz təchizatı ilə bağlı 8-i məlumat üçün olmaqla cəmi 158, istilik təchizatı ilə bağlı cəmi 1 müraciət üçün olmaqla cəmi 23, 3-ü məlumat üçün olmaqla 38 müraciət isə digər məsələlərlə bağlı olub.
Qeyd edilib ki, 1898 müraciətdən 1320-isi agentlik tərəfindən araşdırılıb və cavablandırılıb (48 müraciət müvafiq qaydada baxılması və tədbir görülməsi üçün aidiyyəti quruma göndərilib. İki müraciət Energetika Nazirliyi ilə müştərək icra olunub, 406 müraciət hazırda baxılma prosesindədir, 170 məlumat xarakterli müraciətdən 92-si qaldırılan problemlərin həlli ilə bağlı təşəkkür məktubu olub. Yeni, yenidən qurulan, istifadə olunmasına icazə verilmiş gücü artırılan və enerjitəchizat sxemini dəyişən 32 tikinti obyektinin xarici elektrik enerjisi təchizatı üçün quraşdırılmış elektrik qurğularına istismara buraxılış aktı verilib. 97 razılaşdırılmış layihəyə əsasən tikintisi başa çatdırılmış sənaye qaz qurğularının istismarına icazə verilib.
“AzərEnerji” ASC və “Azərişıq” ASC-nin nümayəndələrinin iştirakı ilə bir hesablaşma elektrik sayğacının texniki vəziyyətinə baxış keçirilib. Agentliyin səlahiyyətlərinə aid olan Azərbaycan Respublikası İnzibati Xətalar Məcəlləsinin müvafiq maddələri üzrə 28 inzibati xəta haqqında işə baxılıb və müvafiq qərarlar çıxarılıb. Elektrik qurğularının texniki istismarı, təhlükəsizlik texnikası qaydalarına əməl olunması və elektrik enerjisindən istifadənin vəziyyətinin araşdırılması məqsədilə 212 nəzarət tədbiri keçirilib.
Qazdan səmərəli istifadənin, “Qazdan istifadə Qaydaları”nın və qaz qurğularının etibarlı istismarının, həmçinin digər normativ-hüquqi aktların tələblərinə əməl olunmasının vəziyyətinin araşdırılması məqsədilə 177 nəzarət tədbiri keçirilib. Agentlik tərəfindən hesabat dövrü ərzində 72 müəssisədə 169 nəfər olmaqla elektrotexniki heyətin və elektrik təsərrüfatlarına cavabdeh şəxslərin texniki istismar, təhlükəsizlik texnikası qaydaları üzrə peşə bilikləri yoxlanılıb, yoxlama nəticəsində biliklərin artırılması üzrə təkliflər verilib, bu istiqamətdə müvafiq şəxslərə metodiki yardım göstərilib. 15 “ASAN xidmət", 3 “ASAN Kommunal” mərkəzi və 3 KOB evində (Kiçik və orta biznes evləri) fəaliyyət göstərən Texniki Şuralara sahibkarlıq obyektlərinin elektrik şəbəkəsinə qoşulması ilə bağlı daxil olan 916 müraciət qəbul edilərək icra edilib.