Cəmil Xudiyev: Müasir şəhərlərdə yanğın təhlükəsizliyinin təmin edilməsində layihələndirmə mərhələsi həlledici rol oynayır
Bakı, 14 may, AZƏRTAC
Müasir şəhər anlayışı artıq təkcə gözəl memarlıq və inkişaf etmiş infrastruktur demək deyil. Bu gün şəhərlərin əsas keyfiyyət göstəricilərindən biri onların təhlükəsizlik səviyyəsidir. İnsanların yaşadığı, çalışdığı və istirahət etdiyi mühit nə qədər müasir olursa-olsun, əgər həmin mühit təhlükəsiz deyilsə, dayanıqlı inkişafdan danışmaq mümkün deyil. Bu baxımdan şəhərsalma fəaliyyətində yanğın təhlükəsizliyinin təmin olunması xüsusi strateji əhəmiyyət daşıyır.
AZƏRTAC xəbər verir ki, bunu Ümumdünya Şəhərsalma Forumunun On Üçüncü Sessiyası (WUF13) ilə əlaqədar Fövqəladə Hallar Nazirliyi (FHN) tərəfindən “Şəhərsalma fəaliyyətində tikinti, yanğın, texniki və radiasiya təhlükəsizliyinin təmin olunmasında dövlət nəzarəti” mövzusunda dəyirmi masada çıxışı zamanı nazirliyin Dövlət Yanğın Nəzarəti Xidmətinin rəis müavini, daxili xidmət polkovniki Cəmil Xudiyev deyib.
Son illər dünyada sürətli urbanizasiya prosesinin müşahidə olunduğunu bildirən rəis müavini qeyd edib ki, əhali sıxlığının artması, çoxfunksiyalı komplekslərin, hündürmərtəbəli yaşayış binalarının, iri ticarət və logistika mərkəzlərinin tikilməsi yanğın təhlükəsizliyi sahəsində yeni çağırışlar formalaşdırır. Xüsusilə böyük şəhərlərdə bir ərazidə on minlərlə insanın cəmləşməsi mümkün fövqəladə hadisələrin nəticələrini daha ağır və genişmiqyaslı edə bilir.
Cəmil Xudiyev vurğulayıb ki, yanğın təhlükəsizliyi məsələsi yalnız fövqəladə hadisəyə müdaxilə ilə məhdudlaşmır. Əsas məqsəd yanğının baş verməsinin qarşısının alınması, risklərin qabaqcadan qiymətləndirilməsi, idarəolunması və insanların təhlükəsiz təxliyəsinin təmin edilməsidir. Bu səbəbdən şəhərsalma fəaliyyətinin bütün mərhələlərində təhlükəsizlik prinsipləri əsas prioritet kimi nəzərə alınmalıdır. Praktik təcrübə göstərir ki, bir çox hallarda yanğın hadisələrinin ağır nəticələrə səbəb olmasının əsas səbəbi layihələndirmə zamanı təhlükəsizlik tələblərinin tam nəzərə alınmaması, normativ sənədlərin pozulması və ya obyektlərin istismarı zamanı nəzarətin zəifləməsidir. Məhz buna görə dövlət nəzarəti mexanizmləri şəhərsalma prosesinin ayrılmaz hissəsi kimi çıxış edir.
Şəhərsalma sahəsində yanğın təhlükəsizliyi üzrə dövlət nəzarəti isə ilk növbədə aşağıdakı istiqamətləri əhatə edir:
- layihələrin ekspertizası zamanı yanğın təhlükəsizliyi tələblərinin qiymətləndirilməsi və nəzərə alınması istiqamətində tədbirlərin görülməsi;
- tikinti prosesində norma və qaydalara əməl olunmasına nəzarət;
- obyektlərin istismara qəbulundan əvvəl yanğından müdafiə sistemlərinin layihə həllərinə uyğunluğu və işlək vəziyyətdə olmasının yoxlanılması;
- istismar dövründə profilaktik monitorinqlərin aparılması;
- yüksəkriskli obyektlər üzrə əlavə təhlükəsizlik tədbirlərinin tətbiqi.
Rəis müavini qeyd edib ki, müasir şəhərlərdə yanğın təhlükəsizliyinin təmin edilməsində layihələndirmə mərhələsi həlledici rol oynayır. Təxliyə yollarının düzgün hesablanması, insanların təhlükəsiz çıxış imkanlarının yaradılması, tüstünün yayılmasının məhdudlaşdırılması, yanğın bölmələrinin operativ giriş imkanları, su təchizatı sistemlərinin əlçatanlığı və avtomatik xəbərdarlıq və söndürmə sistemləri əvvəlcədən düzgün planlaşdırılmalıdır. Əks halda ən müasir memarlıq həlli belə ciddi risk mənbəyinə çevrilə bilər. “Bu gün dünyada baş verən iri yanğın hadisələrinin təhlili göstərir ki, insanların həyatını itirməsinə əsas səbəb çox zaman alov deyil, tüstülənmə, xaotik təxliyə və təhlükəsizlik sistemlərinin işləməməsidir. Buna görə də yanğın təhlükəsizliyi kompleks yanaşma tələb edən mühüm sahədir", - deyə o diqqətə çatdırıb.
Bölmənin digər xəbərləri
