AZƏRTAC xəbər verir ki, avqustun 31-də Sabirabadda təşkil edilən seminar-müşavirədə ətraf bölgələrin - İmişli, Saatlı, Salyan, Neftçala, Hacıqabul rayonlarının və Əli Bayramlı şəhərinin icra hakimiyyəti, bələdiyyə, məhkəmə, hüquq mühafizə orqanlarının, kütləvi informasiya vasitələrinin nümayəndələri iştirak etmişdir.

Seminar-müşavirəni Sabirabad Rayonu İcra Hakimiyyətinin başçısı Heydər Abbasov açmışdır.

Prezidentin İcra Aparatının Regional idarəetmə və yerli özünüidarəetmə orqanları ilə iş şöbəsinin bələdiyyələrlə iş sektorunun müdiri Ramiq Həşimovun mövzu ilə bağlı geniş məruzəsi dinlənilmişdir.

Ümummilli lider Heydər Əliyevin birbaşa rəhbərliyi ilə hazırlanmış və 1995-ci il noyabrın 12-də qəbul olunmuş Azərbaycan Respublikasının ilk Konstitusiyasının ölkəmizdə genişmiqyaslı demokratik islahatların həyata keçirilməsinin əsasını qoyduğunu bildirən natiq, Əsas Qanunda birinci dəfə olaraq yerli özünüidarəetmə orqanının - bələdiyyə təsisatının da yaradılmasının təsbit edildiyini vurğulamışdır.

Müstəqil Azərbaycan dövlətinin qurucusu olan ulu öndərimizin vaxtilə dediyi - “Biz Azərbaycanda qeyri-dövlət, tam müstəqil yerli özünüidarəetmə orqanları yaradırıq, bu, həm də demokratiyanın inkişafı deməkdir, eyni zamanda, ölkəni idarə etməkdə vətəndaşlarımıza imkanlar yaradılmasının göstəricisidir” sözlərini xatırladan məruzəçi qeyd etmişdir ki, ümummilli liderimizin bu fikirləri artıq real həyatda öz təsdiqini tapmışdır. Belə ki, bələdiyyə sistemi cəmiyyətimizin tərkib hissəsinə çevrilmişdir.

Avropa Şurasının “Yerli özünüidarə haqqında Xartiyası”nda (1985-ci il) və “Bələdiyyələrin statusu haqqında” Azərbaycan Respublikası Qanununda əks olunduğu kimi, müəyyən ərazi vahidinin hüdudları daxilində özünüidarəni, yerli əhəmiyyətli məsələləri müstəqil və sərbəst həll etmək hüququnu həyata keçirən, seçkilər əsasında yaradılan bələdiyyələr, əhalinin mənafeyi naminə dövlət işlərinin bir hissəsini öz üzərinə götürərək yerinə yetirən qeyri-dövlət sistemi kimi həm də xalqla dövlət arasında münasibətlərin tənzimlənilməsində mühüm rol oynayır. Cəmiyyətin bütün təbəqələrinin demokratik, hüquqi dövlət quruculuğu prosesində iştirakına geniş imkanlar açır.

Məruzəçi Azərbaycan Prezidenti İlham Əliyevin Milli Məclisə seçkilərlə bağlı 2005-ci il mayın 11-də və oktyabrın 25-də imzaladığı sərəncamlarda ölkəmizdə seçki praktikasının təkmilləşdirilməsi, qanunvericiliyin tələblərinə uyğun demokratik, azad, ədalətli, şəffaf seçkilərin keçirilməsi ilə bağlı qarşıya qoyduğu mühüm vəzifələrin icrası baxımından yerli icra, bələdiyyə, məhkəmə, hüquq mühafizə orqanlarının vəzifələrindən də ətraflı bəhs etmişdir. Nüfuzlu beynəlxalq təşkilatlar tərəfindən müsbət dəyərləndirilən həmin sərəncamların əsas mahiyyətinin bu il oktyabrın 6-a təyin edilmiş ilk dəfə, təkrar, əlavə və yeni keçiriləcək seçkilərə də tam şamil olunduğunu bildirən Ramiq Həşimov demişdir ki, həmin gün 82 seçki dairəsi üzrə 603 bələdiyyəyə 1931 üzv seçilməlidir. Qanunla müəyyən edilmiş bu yerlər uğrunda mübarizəyə 4600-dən çox namizədin qoşulması da bələdiyyə təsisatına, bu idarəetmə sisteminə cəmiyyətdə marağın və inamın getdikcə artmasının ifadəsidir. Müstəqil dövlətimizin qurucusu Heydər Əliyevin “bələdiyyələrin ölkədə başlanmış demokratik cəmiyyət quruculuğu prosesində önəmli rolu olacaqdır” fikrini xatırladan məruzəçi demişdir ki, ötən müddətdə bələdiyyələr respublikada gedən nəhəng quruculuq, sosial-iqtisadi inkişafın fəal iştirakçılarından birinə çevrilmişdir.

O, yerli özünüidarəetmə orqanlarının təşkilatlanması sahəsində görülən işlərdən də danışaraq bildirmişdir ki, bu il iyunun 6-da Bakıda respublikanın bütün şəhər və rayonlarını əhatə edən 72 bələdiyyə sədrinin iştirakı ilə keçirilən təşkilati iclasda ölkəmizdə ayrı-ayrılıqda şəhər, qəsəbə və kənd bələdiyyələrinin milli assosiasiyalarının yaradılması məqsədi ilə işçi qrupları təşkil edilmişdir. Onlar milli assosiasiyaların nizamnamə layihələrini hazırlayaraq, təsis toplantılarına nümayəndəlik norması müəyyən edəcəklər. Bu qurumların yaradılması bələdiyyyələrin dövlət təşkilatları və ictimai təşkilatlarla əlaqəsinin möhkəmlənməsinə də səmərəli kömək göstərəcəkdir.

Bildirilmişdir ki, Avropa Şurasının Yerli və Regional Hakimiyyətlər Konqresinin sədri Halvadan Skard iyunda ölkəmizə səfəri zamanı Azərbaycan Prezidenti İlham Əliyev tərəfindən qəbul edilmiş, Prezidentin İcra Aparatının rəhbəri Ramiz Mehdiyevlə görüşmüş, “Azərbaycanda yerli hakimiyyətlərin milli assosiasiyalarının quruluşu necə olmalıdır?” mövzusunda dəyirmi masada iştirak etmişdir. Konqres nümayəndələri yaradılmış 3 işçi qrupun fəaliyyətini istiqamətləndirmək, onlara əməli kömək göstərmək üçün Prezidentin İcra Aparatının, Milli Məclisin, Ədliyyə Nazirliyinin hərəsindən bir nəfər də daxil olmaqla, cəmi 6 nəfərdən ibarət əlaqələndirici şəxslərin də olmasını təklif etmişlər. Bu, respublikamızda bələdiyyə təsisatına Avropa Şurasında da marağın artdığını göstərir.

Prezident Aparatının məsul işçisi ötən həftə Şamaxıda keçirilən ilk müşavirədə bələdiyyə üzvləri ilə açıq, işgüzar fikir mübadiləsi aparıldığını, yerlərdə bələdiyyə mülkiyyətində olan torpaq sahələrindən bəzi hallarda səmərəli istifadə olunmadığını, qanunsuzluqlara yol verildiyini, ünvanlı sosial yardımların müəyyən edilməsində, əhaliyə şəxsiyyət vəsiqələrinin verilməsində narazılıqların, anlaşılmazlıqların mövcud olduğunu bildirdi. Keçirilən seminar-müşavirələrin təkcə maarifləndirmə xarakteri deyil, həm də yerlərdə mövcud olan belə nöqsanların, çatışmazlıqların aşkar edilməsi, aradan qaldırılması məqsədi daşıdığını da vurğulamışdır.

Azərbaycan Respublikasının İnsan Hüquqları üzrə Müvəkkili (Ombudsman) Elmira Süleymanova “İnsan hüquqlarının təmin olunmasında bələdiyyələrin rolu” mövzusunda çıxışında bələdiyyələrin fəaliyyəti ilə bağlı Ombudsman aparatına daxil olan ərizə və şikayətlərin əsas xarakterik cəhətləri barədə məlumat vermiş, ötən seçkilərdə əldə edilmiş təcrübənin təkmilləşdirilməsi, yol verilmiş nöqsan və çatışmazlıqların aradan qaldırılması üçün həlli vacib məsələləri diqqətə çatdırmış, bələdiyyə seçkiləri ərəfəsində belə tədbirlərin keçirilməsinin əhəmiyyətli olduğunu söyləmişdir. Ombudsman dövlətimizin başçısı İlham Əliyevin son parlament seçkiləri ərəfəsində imzaladığı məlum sərəncamlardan irəli gələn tələblərin yerinə yetirilməsinin zəruriliyini xüsusi vurğulamışdır.

E.Süleymanova insan hüquq və azadlıqlarının təmin olunmasında bələdiyyələrin üzərinə də mühüm vəzifələr düşdüyünü bildirmişdir. İlham Əliyevin “Mən hər bir Azərbaycan vətəndaşının Prezidenti olacağam” fikrini xatırladan Ombudsman regionlara tez-tez səfər edən dövlətimizin başçısının vətəndaşların şikayətlərinə çox həssaslıqla yanaşdığını və hər bir vəzifəli şəxsin bundan nəticə çıxarmalı olduğunu vurğulamışdır.

Ədliyyə Nazirliyinin Bələdiyyələrlə iş mərkəzinin rəisi Mehdi Səlimzadə “Yerli özünüidarənin təşkili: problemlər, vəzifələr” mövzuda məruzəsində bələdiyyələrin fəaliyyəti üçün ölkəmizdə hərtərəfli hüquqi bazanın mövcud olduğunu faktlarla əsaslandırmışdır. Yerlərdə bələdiyyə torpaqlarından heç də həmişə məqsədəuyğun, qanuna müvafiq istifadə edilmədiyini vurğulamış, icra orqanları ilə əlaqələri daha da möhkəmləndirməyin, hüquqi maarifləndirmə işlərini gücləndirməyin vacibliyini söyləmişdir. Məruzəçi son illər beynəlxalq qurumların Azərbaycanda yerli özünüidarə sahəsində əldə edilən uğurları müsbət dəyərləndirdiyini də xatırlatmışdır.

Mərkəzi Seçki Komissiyasının üzvü Tofiq Həsənov “Bələdiyyə seçkilərində vətəndaşların seçki hüquqlarının təmin olunması” mövzusunda çıxışında demişdir ki, artıq seçki prosesi əsas mərhələyə keçmiş, namizədlərin təbliğat və təşviqat kampaniyası başlamışdır. Seçkilərin ədalətli, azad, şəffaf şəraitdə keçirilməsi üçün MSK tərəfindən görülən tədbirlər, dairə, məntəqə seçki komissiyalarının bundan sonrakı fəaliyyətinin əsas istiqamətləri barədə danışan məruzəçi beynəlxalq qurumların bu seçkilərə də maraq göstərdiyini bildirmişdir.

Məruzələrdən sonra müzakirələrdə açıq, işgüzar fikir mübadiləsi aparılmış, qarşıya çıxan və həlli vacib olan məsələlər, mövcud çətinliklər barədə söhbət getmiş, seçkilərin azad, demokratik keçirilməsi üçün ayrı-ayrı rayonlarda görülən işlər haqqında məlumat verilmiş, maraq doğuran suallara aydınlıq gətirilmişdir.

Ramiq Həşimov seminar-müşavirəyə yekun vuraraq bildirmişdir ki, çıxışlarda səslənmiş bütün təklif və tövsiyələr Prezidentin İcra Aparatının Regional idarəetmə və yerli özünüidarəetmə orqanları ilə iş şöbəsində diqqətlə öyrəniləcək, mövcud problemlərin aradan qaldırılması üçün konkret tədbirlər görüləcəkdir.