Cənubi Koreya və Kuba arasında diplomatik əlaqələr qurulub
Pekin, 15 fevral, AZƏRTAC
Cənubi Koreya və Kuba arasında diplomatik əlaqələr qurulub.
AZƏRTAC Yonhap agentliyinə istinadla xəbər verir ki, bu barədə Cənubi Koreyanın BMT-dəki daimi nümayəndəliyi açıqlama yayıb.
“Hər iki dövlət arasında rəsmi əlaqələrin qurulması qərarı Birləşmiş Millətlər Təşkilatının Nizamnaməsinə, beynəlxalq hüququn məqsəd və prinsiplərinə və 1961-ci il 18 aprel tarixli diplomatik əlaqələr haqqında Vyana Konvensiyasının müəyyən etdiyi ruh və qaydalara uyğun olaraq qəbul edilib", - deyə Cənubi Koreyanın BMT-dəki daimi nümayəndəliyinin məsələyə dair açıqlamasında qeyd olunub. Tərəflər qarşılıqlı olaraq Seulda və Havanada səfirliklərin açılmasına da qərar verib.
Qeyd edək ki, Kuba özü kimi sosialist ideologiya əsaslı Şimali Koreya ilə sıx əlaqələri olan azsaylı ölkələrdən biridir. İkinci Dünya müharibəsindən sonrakı “soyuq müharibə” dövründə tərəflər sıx müttəfiqlik nümayiş etdirib. Kubanın Pxenyanda səfirliyi də fəaliyyət göstərir.
Cənubi Koreyanın isə 1959-cu il Kuba inqilabından bəri ilə bu dövlətlə heç bir rəsmi münasibəti olmayıb. Kuba Cənubi Koreyanın diplomatik əlaqələr qurduğu 193-cü ölkədir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
