Cənubi Koreyalı hərbçilər KXDR-in patrul qayığına xəbərdarlıq atəşi açıblar
Pekin, 16 aprel, AZƏRTAC
Cənubi Koreyanın hərbi dəniz qüvvələri iki ölkə arasında de-fakto dəniz sərhədini keçən Koreya Xalq Demokratik Respublikasının patrul qayığına xəbərdarlıq atəşi açıb.
AZƏRTAC xəbər verir ki, bu barədə Yonhap agentliyi Cənubi Koreya hərbçilərinə istinadla xəbər yayıb.
Bildirilir ki, hadisə aprelin 15-də saat 11:00 radələrində baş verib. KXDR-in patrul qayığı Sarı dənizdəki Cənubi Koreyanın Benqnyeonq adası yaxınlığında dəniz sərhədini keçib. Cənubi Koreya hərbi dəniz qüvvələrinin hadisə yerindəki patrul qayığı ölkənin dəniz sərhədini tərk etməsi üçün Şimali Koreyanın patrul qayığına rabitə kanalları vasitəsilə xəbərdarlıq edib. Şimali Koreya patrul qayığı bu xəbərdarlıqlara məhəl qoymadığı üçün Cənubi Koreya hərbçiləri 10 dəfə xəbərdarlıq atəşi açıblar.
Məlumatda qeyd olunub ki, KXDR-in patrul qayığı Çinin balıqçı qayığını təqib edərək, Cənubi Koreya sərhədini keçib. Cənubi Koreya silahlı qüvvələrinin birləşmiş qərargahı əməliyyat zamanı ölkənin hərbi dəniz qüvvələrinin patrul qayığı ilə Çin balıqçı qayığının toqquşduğunu, nəticədə dənizçinin xəsarət aldığını açıqlayıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
