Çətin, amma yüksək tələbat olan peşə - qaynaqçı
Bakı, 10 yanvar, AZƏRTAC
Metal gündəlik həyatımızın ayrılmaz parçasıdır. Bu materialdan bir çox istehsal və tikinti sahələrində geniş şəkildə istifadə olunur. Bu gün metal parçalarını birləşdirən qaynaqçı peşəsinə təlabat artmaqdadır.
AZƏRTAC-ın əməkdaşı çətin, amma əmək bazarında yüksək tələbat olan qaynaqçı sənətinin öyrədildiyi Sənaye və İnnovasiyalar üzrə Bakı Dövlət Peşə Təhsil Mərkəzində olub.
Mərkəzdə qaynaqçılıq sənaye və quraşdırma ixtisasında öyrədilir. Bu ixtisasda tələbələrə ümumi qaynaqla yanaşı, təhlükəsizlik tədbirləri, boruların təsisatı, onlara texniki xidmətin göstərilməsi, ümumi santexnika işləri, havalandırma sistemi, avtokart proqramı vasitəsilə quraşdırma sxemlərinin çəkilişi və digər bilik və bacarıqlar öyrədilir.
4 ildir ki, mərkəzdə çalışan Ramiz Abdullayev sənaye və quraşdırma ixtisası üzrə metodist olaraq fəaliyyət göstərir. Deyir ki, tədris etdiyi ixtisas çətin olsa da, gənclər arasında kifayət qədər maraq var: “Hazırda yüksək texniki peşə (üçillik) və birillik olmaqla ixtisasda iki qrup var. Birinci qrup hazırda imtahan ərəfəsindədir. Birillik qrupumuzda 16 tələbə təhsil alır. Onların arasında ali məktəb məzunu da var. Bu sahədə yaş məhdudiyyəti yoxdur. 17 yaşdan 39 yaşadək tələbələrimiz var”.
Ramiz Abdullayev bildirir ki, qaynaqçı ixtisasını bitirən tələbələr gələcəkdə sənayenin müxtəlif sahələrində çalışa bilərlər: “İl ərzində əməkdaşlıq etdiyimiz şirkətlərin nümayəndələri burada tələbələri imtahandan keçirir, təlim proqramlarına cəlb edir və işlə təmin edirlər. Ötənilki tələbələrimizdən həmin şirkətlərdə çalışanlar var”.
Həmsöhbətimiz 39 yaşlı İlham Həsənov tələbə yoldaşlarından fərqli olaraq daha təcrübəlidir. Deyir ki, 20 yaşından qaynaqçılıqla məşğuldur: “Təcrübəm olsa da, düşünürəm ki, özümü təkmilləşdirməliyəm. Amma bəzən təcrübə kifayət etmir. Diplom alıb daha yaxşı şirkətlərdə çalışmaq istədiyim üçün buraya üz tutdum”.
17 yaşlı İlkin Sadıqov isə daha əvvəl peşə təmayüllü sinifdə iki il santexnika üzrə təhsil alıb. Lakin əmisinin qaynaqçı olması onda bu sahəyə marağı artırıb və peşə təhsili almağa qərar verib: “Bəzən olur ki, evdə qaynaq işləri görəndə əmimlə məsləhətləşirik. Bu işi sevirəm. İnanıram ki, gələcəkdə peşəkar qaynaqçı olacağam”.
16 yaşlı Rəşad Məmmədkərimov uşaqlıqdan bu sahəyə maraqlı olduğunu deyir: “Təxminən 3 ay sonra təcrübəyə cəlb olunduq. İşimi sevirəm. Buradan məzun olduqdan sonra Azərbaycan Dövlət Neft və Sənaye Universitetində təhsilimi davam etdirmək istəyirəm”.
Peşə seçərkən işin müsbət və mənfi tərəflərini düşünmək vacibdir. Digər peşələrlə müqayisədə qaynaqçılara yüksək tələbat olması ilə yanaşı, bu sahədə rəqabət aşağıdır. Onlar yüksək əməkhaqqı müqabilində fərdi işləyərək iş qrafiklərini özləri tənzimləyirlər.
Bölmənin digər xəbərləri
