Çexiyada bir həftədə 1500-ə yaxın insan göy öskürəyə yoluxub
Bakı, 16 aprel, AZƏRTAC
Ötən həftə Çexiyada göy öskürəyə 1500-ə yaxın yoluxma halı qeydə alınıb ki, bu da ilin ən yüksək həftəlik göstəricisidir.
AZƏRTAC xəbər verir ki, Çexiya Dövlət Sağlamlıq İnstitutunun epidemioloji vəziyyətə dair son hesabatında ilin 15-ci həftəsində (8-14 aprel) 1494 göy öskürək halının qeydə alındığı və bununla da illik ümumi sayın 7888-ə çatdığını bildirilir. Məlumata görə, ölkədə ilin əvvəlindən bəri xəstəlik halları kəskin artıb və martın 18-dən etibarən dördüncü həftədir ki, mini ötür.
Əhalisi 10,9 milyon nəfər olan ölkədə bu il ən çox yayılan xəstəlik məhz göy öskürək olub. Yoluxanlar əsasən 15-19 yaş arası gənclərdir. Onlardan 183-ü xəstəxanaya yerləşdirilib. Xəstəlik nəticəsində üç nəfər ölüb. Səhiyyə orqanları onların digər sağlamlıq problemlərinin də olduğunu qeyd edib.
Göy öskürək çox yoluxucu tənəffüs yolu xəstəliyidir. Yerli media onun yayılmasının əsas səbəbini gənc nəslin daha az peyvənd almasında görür. İnfeksiya halları çoxaldıqca, göy öskürəyə qarşı peyvəndin artımı da müşahidə edilir. 2023-cü ildə təxminən 24 min nəfər revaksinasiya olmuşdusa, bu il həmin göstərici artaraq 45 minə çatıb.
Bölmənin digər xəbərləri
