Çin ABŞ-dan quş əti idxalını dayandırıb
Pekin, 22 iyun, AZƏRTAC
Çin COVID-19 pandemiyası ilə əlaqədar ABŞ-ın iri quş əti istehsalçılarından olan “Tyson Foods” şirkətindən ölkəyə məhsul idxalını dayandırıb.
AZƏRTAC xəbər verir ki, Çinin Baş Gömrük Administrasiyası ABŞ şirkətinin işçiləri arasında yeni növ koronavirusa yoluxma halları aşkarlandıqdan sonra belə qərar qəbul edib. “Tyson Foods”un Çinə son günlərdə çatan və hazırda yolda olan məhsulları da bazarlara buraxılmayacaq.
Çin bir neçə gün əvvəl eyni məsələ ilə əlaqədar Almaniyadan donuz əti idxalını dayandırıb. “Toennies Group”a aid ət kombinatında 657 nəfərin COVID-19 infeksiyasına yoluxması təsdiqləndikdən sonra Çin bu ölkədən donuz əti idxalının dayandırılması barədə qərar verib.
Qeyd edək ki, 56 günlük fasilədən sonra iyunun 11-də Pekində Asiyanın ən böyük meyvə-tərəvəz və ət topdansatış bazarı olan “Sinfadi” ilə əlaqəli ilk COVID-19 yoluxması aşkarlanıb. Paytaxtın səhiyyə qurumlarının işçiləri xaricdən gələn qızıl balığın satıldığı mağazada virus aşkarlayıblar. Hələlik virusun Pekinə xaricdən gəlməsini, habelə onun ərzaq məhsulları vasitəsilə yayıla biləcəyini təsdiqləyən sübut olmasa da, bəzi ekspertlər infeksiyanın xaricdən gəldiyini düşünürlər.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
