Çində ən böyük ticarət sərgisi olan “Kanton” işə başlayıb
Pekin, 15 aprel, AZƏRTAC
Çinin xarici ticarətində mərkəz rolunu oynayan Quancou şəhərində ölkənin ən böyük ticarət sərgisi olan 133-cü Çin idxal və ixrac sərgi-yarmarkanın (Kanton sərgisi) yaz sessiyası işə başlayıb.
AZƏRTAC xəbər verir ki, bu, COVID-19 böhranının başlamasından sonra əyani formada keçirilən ilk Kanton sərgisidir. Yerli və xarici olmaqla ümumilikdə 35 min ziyarətçinin qatılacağı sərgi mayın 5-dək davam edəcək. Bundan başqa, 40 minə yaxın ziyarətçi tədbirə distant formada qoşulacaq. Ümumi ekspozisiya sahəsi 1,5 milyon kvadratmetr olan sərgi-yarmarkada təxminən 70 min köşk fəaliyyət göstərir.
Qeyd edək ki, 1957-ci ildən bəri ildə iki dəfə keçirilən Kanton sərgisi Çinin xarici ticarətinin barometri sayılır. Kanton sərgisi ziyarətçilərin və iştirakçı şirkətlərin, ticarət sövdələşmələrinin və nümayiş olunan məhsulların növ sayına görə dünyada ən böyük ticarət sərgi-yarmarkalarından biridir. Sərgi Çinin Kommersiya Nazirliyinin və Quandon vilayəti hökumətinin birgə təşkilatçılığı ilə ildə iki dəfə - yazda və payızda keçirilir.
Yeri gəlmişkən, Çinin xarici ticarəti ilin birinci rübündə ötən ilin eyni dövrü ilə müqayisədə 4,8 faiz artıb. Çin Baş Gömrük Administrasiyasının məlumatına görə, ilin birinci rübündə ixrac 8,4 faiz çoxalaraq 823 milyard ABŞ dollarına, idxal isə 0,2 faiz artaraq 617 milyard dollara çatıb. Xarici ticarətin ümumi məbləği 1,44 trilyon dollar olub. Çinin “yaşıl” məhsullar, o cümlədən günəş panelləri, litium-ion batareyalar və elektrik avtomobilləri ixracı təxminən 67 faiz artıb.
Hesabat dövründə Çinin ən böyük ticarət tərəfdaşları Cənub-Şərqi Asiya Dövlətləri Assosiasiyası (ASEAN) ölkələri, Avropa İttifaqı və ABŞ olub. “Bir kəmər, bir yol” strategiyasının əhatə etdiyi ölkələr ilə ticarət 16,8 faiz artıb.
Çin ixracın ümumi dəyərinə görə dünyada birinci, idxalın dəyərinə görə isə ABŞ-dan sonra ikinci yerdədir. Ümumi daxili məhsulun (ÜDM) dəyərinə görə, dünyada ikinci olan Çinin iqtisadiyyatının qlobal iqtisadiyyata təsiri olduqca böyükdür. Təsadüfi deyil ki, bir sıra təhlil mərkəzlərinin dünya iqtisadiyyatı ilə bağlı proqnozları Çin iqtisadiyyatının inkişaf proqnozlarına əsaslanır.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
