Çində həkimlər ürəyi 40 saat dayanmış pasiyenti xilas ediblər
Bakı, 23 aprel, AZƏRTAC
Çjetszyan Universitetinin İkinci Xəstəxanasının həkimləri ürəyi faktiki olaraq 40 saatdan çox döyünməyən pasiyenti xilas ediblər.
AZƏRTAC xəbər verir ki, hadisə barədə Çinin “Sohu” nəşri məlumat yayıb. Təxminən 40 yaşlı kişi sinədə sıxılma hissi və nəfəs darlığı şikayətləri ilə klinikaya yerləşdirilib. Qısa müddət sonra ehtimal olunur ki, onda qəfil sürətli miokardit nəticəsində ürək dayanması baş verib. Miokardit ürək əzələsinin ağır iltihabıdır və çox vaxt virus infeksiyası ilə əlaqəli olur.
Təcili yardım şöbəsinin aparıcı həkimi Lu Syaonun sözlərinə görə, pasiyentdə davamlı mədəcik fibrilyasiyası müşahidə olunurdu. Bu, ürəyin qanı səmərəli şəkildə vurmasına imkan verməyən təhlükəli ritm pozuntusudur. Defibrilyasiya vasitəsilə ritmi bərpa etmək üçün təxminən on dəfə cəhd göstərilsə də, nəticə əldə olunmayıb. Pasiyentin həyati funksiyaları yalnız aparat vasitəsilə saxlanılırdı.
Həkimlər pasiyenti ekstrakorporal membran oksigenasiyası (EKMO) sisteminə qoşublar. Bu sistem müvəqqəti olaraq ürək və ağciyərlərin funksiyalarını öz üzərinə götürür. Bununla yanaşı, qan dövranını saxlamaq və tromb yaranmasının qarşısını almaq üçün əlavə üsullar da tətbiq olunub.
40 saatdan çox davam edən intensiv terapiyadan sonra pasiyentin ürəyi tədricən bərpa olunmağa, ritm isə normallaşmağa başlayıb. EKMO aparatı orqanizmi təxminən 10 gün dəstəkləməyə davam edib, bundan sonra onu ayırmaq mümkün olub. Təxminən 20 gün sonra pasiyent özünə gəlib və ciddi ağırlaşmalar müşahidə olunmadan xəstəxanadan evə buraxılıb.
Həkimlər bildirirlər ki, nadir rast gəlinən belə hallar müasir tibbi texnologiyaların, mütəxəssislərin birgə və çevik fəaliyyəti, həmçinin uğurlu şəraitin bir araya gəlməsini tələb edir. Son illərdə EKMO aparatının istifadə edilməsi ilə uzunmüddətli ürək dayanmasından sonra xilas edilən digər pasiyentlər barədə də məlumat verilib, lakin belə nəticələr hələ də müstəsna hal kimi hesab olunur.
Bölmənin digər xəbərləri
