Çinin Çunçin şəhərində şiddətli yağışlar səbəbindən 20 min nəfər təxliyə edilib
Pekin, 6 iyul, AZƏRTAC
Çinin cənub-qərbində yerləşən Çunçin şəhərində şiddətli yağışlar nəticəsində bir neçə çayda suyun təhlükəli həddə çatması səbəbindən 20 mindən çox sakin evlərindən təxliyə edilib.
AZƏRTAC şəhər hakimiyyət orqanlarının məlumatına istinadla xəbər verir ki, yağış son iki gündə 6 çayda suyun xəbərdarlıq səviyyəsini ötməsinə səbəb olub. Səlahiyyətli qurumlar sel və daşqın təhlükəsi ehtimalı ilə ərazidə yaşayan sakinlərin təxliyəsini həyata keçirib. Artıq şəhərin Çician rayonunda bəzi sahil ərazilərini su basıb.
Qeyd edək ki, Çinin milli meteorologiya bürosu ölkənin bir neçə vilayətində leysan yağışları ilə əlaqədar “sarı” səviyyədə xəbərdarlıq elan edib. Çunçin şəhəri ilə yanaşı, Ciansu, Hubey, Şansi, Quandun vilayətlərində, Daxili Monqolustan muxtar bölgəsində və bir neçə vilayətdə şiddətli yağışlar proqnozlaşdırılıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
