ÇİYƏLƏK VƏ CIR MƏRSİN BEYNİN QOCALMASININ QARŞINI ALIR
Tədqiqat zamanı 60 cavan erkək siçovul 3 qrupa bölünmüşdür. Birinci qrup adi yemlə, 2-ci və 3-cü qruplar isə çiyələk və cır mərsin cövhəri qatılmış yemlə qidalandırılırdı. İki ay sonra hər qrupdan siçovulların yarısı radioaktiv şüalanmaya məruz qalmışdır. Alimlərin fikrincə, bu, beynin qocalması prosesini sürətləndirməli idi. Gəmiricilərin ikinci qrupu isə şüalandırılmamışdır.
Sonra üzərində təcrübə aparılan gəmiricilərə sualtı labirintlə hərəkət etməyi öyrətmişlər. Tədqiqatın sonunda alimlər siçovulların baş beyin toxumalarında dofaminin miqdarını ölçmüşlər. Dofamin orqanizmdə yaranan neyromediatordur. Yaddaş, qavrama və diqqət kimi qabiliyyətlər orqanizmdə dofaminin miqdarından asılıdır. Radioaktiv şüalanmaya məruz qalmış və giləmeyvə şirəsi qəbul etməmiş siçovullarda dofaminin səviyyəsi aşağı olmuşdur. Bu heyvanlar labirintdən də çox çətinliklə baş çıxarmışlar. Hər iki giləmeyvənin şirəsini qəbul etmiş və şüalanmış gəmiricilər labirinti şüalanmamış siçovullardan heç də pis keçməmişlər, onların beynində dofaminin səviyyəsi də normaya uyğun olmuşdur.
Layihənin əlaqələndiricisi Barbara Şukitt-Heylinin sözlərinə görə, eksperiment zamanı çiyələk və mərsin cövhərinin xüsusiyyətləri arasında fərq aşkar edilməmişdir. Hərçənd məlumdur ki, bu giləmeyvələr müxtəlif qidalandırıcı xüsusiyyətlərə malikdir. Bundan əlavə, tədqiqatçılar siçovullar üzərində təcrübənin nəticələrini dəyişmədən insanlar üzərində tətbiq etməyin mümkünlüyünə əmin deyillər.
Bölmənin digər xəbərləri
