Cibuti sahillərində batan qayıqda ölənlərin sayı 42 nəfərə çatıb
Qahirə, 13 aprel, AZƏRTAC
Qeyri-leqal miqrantları daşıyan qayığın Cibuti sahillərində batması nəticəsində 42 nəfər ölüb.
AZƏRTAC xəbər verir ki, məlumatı Beynəlxalq Miqrasiya Təşkilatı yayıb.
Təşkilatın Afrika üzrə nümayəndəsi Məhəmməd Abdiker jurnalistlərə bildirib ki, ölənlərin 16-sı uşaqlardır. Batan qayıqdan 14 nəfəri xilas etmək mümkün olub. Bir gün əvvəl faciə nəticəsində 34 nəfərin öldüyü barədə xəbər yayılmışdı, lakin aprelin 13-də faciə qurbanlarının sayı artıb. Bu, son iki ay ərzində Cibuti sahilində baş verən ikinci insidentdir. Ötən ay insan alverçilərinin qayığının batması nəticəsində 20 nəfər ölmüşdü.
Beynəlxalq Miqrasiya Təşkilatının nümayəndəsi Cibuti və Afrikanın qərbində yerləşən digər ölkələrin hökumətlərinə müraciət edərək, onları insan alverinə qarşı ciddi tədbirlər görməyə çağırıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
