COP31: Türkiyə qlobal iqlim gündəliyində rəqabətin deyil, əməkdaşlığın tərəfdarıdır – ANALİTİKA
Ankara, 23 noyabr, AZƏRTAC
Türkiyə Respublikası öz tarixində ilk dəfə olaraq BMT-nin İqlim Dəyişmələri üzrə Çərçivə Konvensiyası Tərəflərinin Konfransına ev sahibliyi etmək hüququna layiq görülüb.
AZƏRTAC xəbər verir ki, COP31-ə ev sahibliyi etmək barədə yekun qərar Braziliyanın Belem şəhərində keçirilən iqlim sammitində (COP30) Azərbaycanın fəal iştirakı ilə keçirilən beşgünlük müzakirələrdən sonra qəbul edilib.
Qərbi Avropa və Digər Dövlətlər Qrupunun (WEOG) üzvləri təşəbbüsü yekdilliklə dəstəkləyib və qərardan əvvəl Türkiyənin ətraf mühit, şəhərsalma və iqlim dəyişikliyi naziri Murat Kurumun iştirakı ilə çoxsaylı görüşlər keçirilib.
Razılaşma çərçivəsində ilk açıqlamanı ölkəsinin COP31-ə ev sahibliyi etməkdən imtina etdiyini elan edən Avstraliyanın Baş naziri Entoni Albanese verib. O, razılaşmaya uyğun olaraq, COP31-də müzakirələrə iqlim dəyişikliyi naziri Kris Bouenin rəhbərlik edəcəyini və konfransa ev sahibliyi etmək hüququnun Türkiyəyə keçdiyini bildirib.
“COP31-ə hazırlıqla bağlı əsas müzakirələr Avstraliyada keçiriləcək və onların mövzusu iqlim maliyyəsi, Sakit okean regionu ölkələri ilə ətraf mühit həmrəyliyi olacaq”, - deyə E. Albanese izah edib. O, COP31-ə ev sahibliyi etmək barədə razılaşmanı "Avstraliya və Türkiyə üçün böyük bir nailiyyət" adlandırıb.
COP-31 iqlim sammitinə hazırlıq görüşləri Sakit okean dövlətində keçiriləcək.
Bu arada, M. Kurum COP30 iqlim sammiti çərçivəsində Braziliya, Azərbaycan və Avstraliyadan olan nümayəndələrlə dördtərəfli görüş, eləcə də Azərbaycan Prezidentinin iqlim məsələləri üzrə elçisi və COP29-un Sədri Muxtar Babayevlə ayrıca görüş keçirib.
Türkiyənin naziri tərəfindən sosial mediada paylaşılan hər iki görüşdə COP31-in təşkili və sədrliyi məsələləri müzakirə olunub.
M. Kurum qeyd edib ki, ölkəsi “2053-cü ilə qədər (Cümhuriyyətin 130 illiyi) xalis sıfır emissiyaya nail olmaq məqsədinə və Türkiyə Prezidenti Rəcəb Tayyib Ərdoğanın müəyyən etdiyi yaşıl transformasiya prosesi vizyonuna uyğun olaraq, COP31 çərçivəsində ədalətli, inklüziv, açıq və şəffaf bir proses həyata keçirmək" niyyətindədir.
Xatırladaq ki, Türkiyənin COP31-ə ev sahibliyi etməyə hazır olması ilk dəfə 2022-ci ildə Şarm əl-Şeyxdə keçirilən COP27 ətraf mühit sammitində elan edilib.
Mediada yayılan məlumatlara görə, qarşıdan gələn sammitdə iştirakçıların sayı nəzərə alınmaqla, Antalyada COP31-in iclaslarının keçirilməsi gözlənilir, liderlər səviyyəsində bəzi müzakirələr isə İstanbulda aparıla bilər.
COP30-un başa çatması ilə yanaşı, Yohannesburqda keçirilən G20 sammitində iştirak edən Prezident Rəcəb Tayyib Ərdoğan BMT-nin İqlim Dəyişmələri üzrə Çərçivə Konvensiyası Tərəflərinin Konfransının 31-ci sessiyasının (COP31) gələn ilin noyabr ayında keçiriləcəyinin planlaşdırıldığını açıqlayıb.
Türkiyə hökuməti, həmçinin 2053-cü ilə qədər sıfır emissiyaya, Yer kürəsinin ekologiyasının qorunmasına və milli iqtisadiyyatın yaşıl transformasiyasına sadiq qaldığını vurğulayıb. Qardaş ölkənin mediası Ankaradakı diplomatik mənbələrə istinadla bildirir ki, ölkə xüsusi sessiyalar təşkil etməklə COP31 iştirakçılarının diqqətini yalnız regionun ekoloji problemlərinə deyil, həm də Sakit okean ölkələrinin üzləşdiyi çətinliklərə yönəltməyə hazırdır.
Rəsmi Ankara əmin edir ki, iqlim dəyişikliyinə qarşı mübarizədə Ankara rəqabətdən daha çox əməkdaşlıq və inklüzivlik prinsiplərinə əsaslanmağa davam edəcək, habelə bütün tərəfləri konstruktiv dialoq və qarşılıqlı hörmətə əsaslanan ətraf mühitin mühafizəsi tədbirlərini irəli aparmağa çağırır. COP31-ə ev sahibliyi etmək qərarı “bəşəriyyətin ortaq gələcəyi üçün qlobal həmrəyliyin nümayişi kimi xarakterizə edilib.
Ümid edilir ki, ölkələr 2026-cı ildə Türkiyədə Belem iqlim sammitinin iştirakçıları tərəfindən əldə edilməyən həll yolları ilə bağlı razılığa gələ biləcək.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
