COVID-19 vaksinlərinin 4.1 faizi istifadə müddəti bitdiyinə görə məhv edilib
Bakı, 23 fevral, AZƏRTAC
Azərbaycanda indiyə qədər yeni növ koronavirus (COVID-19) əleyhinə istifadə edilən vaksinlərin bir qismi istifadə müddəti bitdiyinə görə məhv edilib. Ölkədə məhv edilən vaksin dozalarının sayı 507 min 339-dur.
AZƏRTAC xəbər verir ki, bu barədə “Fəaliyyət üçün məlumat: Effektiv strategiyaların işlənib hazırlanması yolu ilə COVID-19 vaksinlərinin geniş tətbiqinə nail olmaq" adlı konfransda Respublika Gigiyena və Epidemiologiya Mərkəzinin İmmunoprofilaktika şöbəsinin əməkdaşı Əlcəfər Cəfərov məlumat verib.
O qeyd edib ki, respublikada məhv edilən vaksin dozalarının ümumi vaksinlərin 4.1 faizini təşkil edir.
Məhv edilən vaksinlərin 273 min 848 dozası "AstraZeneca", 50 min 592 dozası "Pfizer", 182 min 898 dozası "Sputnik V" vaksinləridir.
Məlumata əsasən, ölkədə "AstraZeneca" vaksininin istifadəsi dayandırılıb.
Bölmənin digər xəbərləri
