Daşkənddə keçirilən tədbirdə ermənilərin azad edilmiş torpaqlarımızda törətdikləri vəhşiliklərdən danışılıb
Daşkənd, 10 noyabr, АZƏRTAC
Özbəkistandakı diaspor təşkilatı olan Respublika Azərbaycan Milli Mədəniyyət Mərkəzi (RAMMM) Zəfər Günü ilə əlaqədar mərasim keçirib.
AZƏRTAC xəbər verir ki, tədbirdə Daşkənddə yaşayan bir qrup azərbaycanlı, qardaş özbək xalqının nümayəndələri, jurnalistlər iştirak ediblər.
Şəhidlərin xatirəsi bir dəqiqəlik sükutla yad olunduqdan sonra çıxış edən RAMMM-in sədri Firdovsi Hüseynov 44 günlük Vətən müharibəsi haqqında məlumat verib, Qələbənin qazanılmasında Prezident, Ali Baş Komandan İlham Əliyevin rəhbərliyi ilə əsgər və zabitlərimizin göstərdikləri şücaətdən danışıb. Ermənistanın Azərbaycana hərbi təcavüz həyata keçirdiyi, işğal olunan torpaqlarımızda əsl vandalizm siyasəti həyata keçirdiyini bildirən F.Hüseynov məscid və ziyarətgahların dağıdıldığını, ermənilərin burada mal-qara və donuz saxladıqlarını diqqətə çatdırıb.
O deyib ki, 44 günlük Vətən müharibəsi günlərində Ermənistan 1949-cu ildə imzalanan Cenevrə Konvensiyasını kobud surətdə pozaraq Azərbaycanın şəhərlərini və mülki obyektləri dağıdıcı raketlərlə atəşə tutub. Gəncə, Mingəçevir, Bərdə, Tərtər, Ağcabədi, Siyəzən və digər şəhərlərimizə, kəndlərimizə 227 raket, 30 min mərmi atılıb. Bu hücumlar nəticəsində aralarında uşaqlar da olmaqla, 100-dən çox mülki şəxs ölüb, 450 nəfər yaralanıb.
Sonra monitorda Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin noyabrın 8-də Şuşada hərbçilər qarşısındakı çıxışı, Türkiyə Prezidenti Rəcəb Tayyib Ərdoğanın Bakının Azadlıq meydanındakı çıxışınıdan videokadrlar göstərilib, vətənpərvərlik ruhunda mahnılar səslənib.
F.Hüseynov Azərbaycan Prezidenti İlham Əliyevə ünvanlanan müraciətin mətnini oxuyub.
Sonra çıxış edən soydaşlarımız - professor Almaz Məcidova, İsmayıl Məmmədov, Həsən Azayev və başqaları Ermənistanın təcavüzkar siyasətini pisləyiblər.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
