Daşkənddə WUF13 çərçivəsində şəhər inkişafında mədəniyyətin roluna həsr olunmuş seminar təşkil edilib
Bakı, 22 may, AZƏRTAC
Azərbaycanın Özbəkistandakı səfirliyinin tabeliyində Heydər Əliyev adına Azərbaycan Mədəniyyət Mərkəzinin təşkilatçılığı ilə Daşkənd Memarlıq və İnşaat Universitetində “Şəhər inkişafında mədəniyyətin rolu və təsiri: Bakı və Daşkənd modellərinin Ümumdünya Şəhərsalma Forumunun 13-cü Sessiyası (WUF13) çərçivəsində müqayisəli təhlili” adlı seminar-proqram keçirilib.
AZƏRTAC xəbər verir ki, tədbirdə mərkəzin direktoru Akif Marifli bildirib ki, WUF13 bu günlərdə dünyanın ən nüfuzlu şəhərsalma platformalarından biri kimi Bakı şəhərində keçirilib. Forumun əsas mövzusu “Hər kəs üçün yaşayış yerləri: Təhlükəsiz və dayanıqlı şəhərlər və yaşayış məskənləri” olub. O qeyd edib ki, şəhər inkişafında mədəni irsin qorunması və milli-mədəni dəyərlərin urbanistik proseslərə inteqrasiyası mühüm rol oynayır.
Akif Marifli, həmçinin vurğulayıb ki, Azərbaycan Prezidenti İlham Əliyev və Özbəkistan Prezidenti Şavkat Mirziyoyev arasında formalaşmış strateji tərəfdaşlıq sayəsində Azərbaycan–Özbəkistan əməkdaşlığı şəhərsalma, memarlıq və mədəni irsin qorunması sahələrində uğurla inkişaf edir və bu, Türk dünyasında ortaq urbanistik məkanın formalaşmasına töhfə verir.
Daşkənd Memarlıq və İnşaat Universitetinin rektoru Baxrom Tolaqanov çıxış edərək seminarın universitetdə keçirilməsindən məmnunluğunu bildirib. O qeyd edib ki, WUF13 çərçivəsində Bakı və Daşkənd şəhərlərinin mədəniyyət, memarlıq irsi və şəhərsalma təcrübəsi baxımından müqayisəli təhlili aktual və əhəmiyyətlidir.
Rektor vurğulayıb ki, bu mövzu tələbələr, tədqiqatçılar və mütəxəssislər üçün həm elmi, həm də praktik baxımdan faydalıdır. O, Heydər Əliyev adına Azərbaycan Mədəniyyət Mərkəzinin təşəbbüsünü yüksək qiymətləndirərək belə tədbirlərin Azərbaycan və Özbəkistan arasında elmi-akademik əməkdaşlığın inkişafına, gənc mütəxəssislərin bilik və dünyagörüşünün genişlənməsinə töhfə verdiyini qeyd edib.
Seminar çərçivəsində Bakı və Daşkənd modelləri müqayisəli şəkildə təhlil olunub. Bakı nümunəsində tarixi irsin müasir şəhər mühiti ilə uzlaşdırılması, mədəniyyət obyektlərinin şəhərin beynəlxalq imicinə təsiri və urbanizasiya prosesində mədəni məkanların rolu diqqətə çatdırılıb. Daşkənd modeli isə 1966-cı il zəlzələsindən sonra şəhərin yenidən qurulması, planlı şəhərsalma yanaşması və tarixi-mədəni irsin müasir memarlıqla inteqrasiyası kontekstində təqdim edilib.
Bildirilib ki, hər iki şəhərin inkişaf təcrübəsi mədəniyyətin şəhər transformasiyasında mühüm rol oynadığını göstərir. Mədəniyyət obyektləri yalnız memarlıq nümunəsi deyil, həm də sosial ünsiyyət, ictimai iştirak, turizm, yaradıcı iqtisadiyyat və şəhər kimliyinin gücləndirilməsi baxımından əhəmiyyətli məkanlardır. Bu mənada Bakı və Daşkənd modelləri tarixi irsin qorunması ilə müasir şəhər inkişafı arasında balansın yaradılması baxımından diqqətəlayiq nümunələr kimi dəyərləndirilib.
Tədbirdə memarlıq və şəhərsalma sahəsi üzrə mütəxəssislər, mədəniyyət və elmi ictimaiyyətin nümayəndələri, eləcə də Daşkənd Memarlıq və İnşaat Universitetinin professor-müəllim heyəti və tələbələri iştirak ediblər.
Seminar WUF13 çərçivəsində şəhər inkişafına mədəni yanaşmanın əhəmiyyətini vurğulayan, Azərbaycan və Özbəkistan arasında mədəni-humanitar və elmi-akademik əməkdaşlığın genişlənməsinə töhfə verən mühüm tədbir kimi yadda qalıb.
Bölmənin digər xəbərləri
