Daşkənddə Xocalı soyqırımı qurbanlarının xatirəsi hörmətlə anılmışdır
Daşkənd 24 fevral (AZƏRTAC). Azərbaycanın Özbəkistandakı səfirliyi Heydər Əliyev adına Azərbaycan Mədəniyyət Mərkəzində Xocalı faciəsinin 20 illiyi ilə əlaqədar anma mərasimi keçirmişdir.
Tədbirdə Türkiyə səfirliyinin əməkdaşları, Özbəkistanın elm və mədəniyyət xadimləri, Azərbaycan diasporunun fəalları, jurnalistlər iştirak etmişlər.
Əvvəlcə mərasimin iştirakçıları “Xocalı faciəsi”, “Xocalı faciəsi dünya KİV-lərində”, “Xocalı faciəsi uşaqların gözü ilə” stendlərinə, həmçinin “Xocalı faciəsi elmi-kütləvi nəşrlərdə” adlı kitab sərgisinə baxmışlar. Sərgidə Xocalı faciəsi və Ermənistan-Azərbaycan, Dağlıq Qarabağ münaqişəsi ilə bağlı kitab və broşürlər nümayiş etdirilmişdir.
İştirakçılar İslam Əməkdaşlığı Təşkilatının Gənclər Forumunun mədəniyyətlərarası dialoq üzrə baş əlaqələndiricisi Leyla xanım Əliyevanın təşəbbüsü ilə irəli sürülən “Xocalıya ədalət” beynəlxalq məlumat və təşviqat kompaniyasının gedişi və görülən işləri əks etdirən stendə də maraqla tamaşa etmişlər.
Xocalıda şəhid olmuş qurbanların xatirəsi bir dəqiqəlik sükutla yad edilmiş, Azərbaycanın Özbəkistandakı müvəqqəti işlər vəkili Akif Əliyev Prezident İlham Əliyevin Xocalı soyqırımının 20-ci ildönümü ilə əlaqədar Azərbaycan xalqına müraciətini oxumuşdur.
A.Əliyev Prezident İlham Əliyev başda olmaqla dövlətimizin Xocalı soyqırımının əsl mahiyyətinin, həmçinin erməni terrorizminin bütün bəşəriyyətə təhlükə olmasının sübutuna yönəldilmiş fəaliyyəti haqqında məlumat vermişdir. Məhz bu məqsədyonlü siyasətin nəticəsidir ki, Xocalı faciəsini artıq Meksika və Pakistan parlamentləri soyqırımı kimi tanımışdır və bu istiqamətdə fəaliyyət davam etdirilir.
Diplomat XX əsrin qəddar və qanlı hadisələrindən biri olan Xocalı faciəsinin erməni təcavüzkarlarının Azərbaycan xalqına qarşı yürütdüyü etnik təmizləmə və soyqırımı siyasətinin bir səhifəsi olduğunu qeyd etmişdir.
Səfirliyin ikinci katibi Səbuhi Əhmədov “Xocalıya ədalət” kampaniyası haqqında söhbət açmış, qeyd etmişdir ki, bu aksiyanın məqsədi beynəlxalq ictimaiyyətə Xocalı soyqırımı ilə bağlı məlumatların verilməsi, faciəyə beynəlxalq səviyyədə hüquqi-siyasi qiymət verilməsi və anılmasıdır.
Sonra Qafqaz Müsəlmanları İdarəsinin sədri, şeyxülislam hacı Allahşükür Paşazadənin Azərbaycandakı pravoslav, yəhudi və katolik kilsələrinin rəhbərləri ilə birgə dünya xalqlarına, dövlət başçılarına, parlamentlərə və beynəlxalq təşkilatlara ünvanlanmış müraciəti oxunmuşdur.
Səbuhi Əhmədov Leyla xanım Əliyevanın təşəbbüsü ilə keçirilən “Xocalıya ədalət” kampaniyasının internet saytı (www.justiceforkhojaly.org) haqqında da məlumat vermiş, faciədən sonra mərhum Çingiz Mustafayevin və fransız operatorlarının çəkdikləri videokadrlar, həmçinin “Məhv edilmiş şəhər” sənədli filmi, eləcə də Toni Blekman və “Dəyirman” qrupunun rep üslubunda “Xocalıya ədalət” klipi nümayiş etdirilmişdir.
Şair İxtiyar Rza, alim Almaz Məcidova, Mİxail Qornoşteyn və başqaları “Xocalıya ədalət” kampaniyasının əhəmiyyətindən danışmış, faciə haqqında dünya ictimaiyyətinə məlumatların çatdırılmasının vacibliyini vurğulamışlar.
Tədbir çərçivəsində iştirakçıların imzatoplama aksiyası da keçirilmiş, mərkəzin kompyuter otağında “Xocalıya ədalət” kampaniyasına internet səsverməsi təşkil edilmişdir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
