Daynyus Pavalkis: Litva və Azərbaycan təhsil sahəsində də sıx əlaqələr saxlayırlar
Vilnüs, 24 oktyabr, Nigar Cəfərli, AZƏRTACLitvanın ali məktəblərini seçən Azərbaycan gənclərinin sayı ilbəil artır. Hazırda “Azərbaycan gənclərinin xaricdə təhsili üzrə Dövlət proqramı”nda iştirak edən ali məktəblərin siyahısına Litvanın beş universiteti - Vilnüs Universiteti, Gediminas adına Vilnüs Texniki Universiteti, Kaunas Texnologiya Universiteti, Litva Sağlamlıq Elmləri Universiteti (Kaunas şəhəri) və Böyük Vitautas Universiteti (Kaunas şəhəri) daxil edilib.
Litvanın təhsil və elm naziri Daynyus Pavalkis AZƏRTAC-ın müxbirinə müsahibəsində təhsil sahəsində əməkdaşlıqdan və əməkdaşlığın inkişaf perspektivlərindən söz açıb.
- Lİtva ilə Azərbaycan arasında sıx əməkdaşlıq yaranıb. Bu əməkdaşlıq xüsusən təhsil sahəsində genişlənib. Aşağıdakı rəqəmlər bu faktı çox gözəl əks etdirir: 2011-ci ildə Litvada cəmi 50 azərbaycanlı təhsil alırdısa, bu il onların sayı dörd dəfə artıb. Litvanın ali məktəbləri 2010-cu ildən başlayaraq Litvada ali təhsil almaq imkanlarını geniş təbliğ etməyə başlayıblar. 2011-ci ildə isə Azərbaycandan olan tələbələrə Litvanın dövlət təqaüdlərini almaq hüququ verilib.
- Litva nümayəndə heyətinin Bakıda keçirilən Beynəlxalq təhsil və karyera sərgisində iştirakını necə qiymətləndirirsiniz?
- Ali məktəblərimiz artıq neçə ildir Bakıda keçirilən təhsil yarmarkalarında Azərbaycan gənclərinə ünvanlanan, Litvada ali təhsil mövzusunda təqdimatlarla iştirak edir. Bu il Beynəlxalq təhsil və karyera sərgisində 15 ali məktəbimiz iştirak edib. Onlar gözəl təəssüratlarla qayıdıblar. Azərbaycan gənclərini Litvada Avropa təhsili almağın şərtləri maraqlandırır. Biz görürük ki, istər gəncləri, istərsə də onların valideynlərini Litvanın ali məktəblərində ingilis və rus dillərində təhsil, Litvada beynəlxalq səviyyəli təhsil almaq imkanı cəlb edir. Litva həm də mədəniyyət, tarix və təbiətin nadir harmoniyası ilə diqqəti cəlb edir.
- Hazırda ölkələrimiz arasında təhsil sahəsində hansı müqavilələr qüvvədədir?
- Hazırda Litva Respublikasının Hökuməti və Azərbaycan Respublikasının Hökuməti arasında təhsil, elm və texnologiyalar sahəsində əməkdaşlıq haqqında saziş hazırlanır. Biz azərbaycanlı həmkarlarımızın həmin sənədin layihəsi ilə bağlı fikirlərini gözləyirik. Yaxşı haldır ki, Litvanın ali məktəbləri Azərbaycandakı tərəfdaşlar ilə çoxlu sayda birbaşa müqavilə imzalayıb. Əməkdaşlıq haqqında müqavilələr strateji tərəfdaşlığın mövcud ənənələrini möhkəmləndirməyə və yenilərini yaratmağa imkan verir.
- “Azərbaycanlı gənclərin xaricdə təhsili üzrə Dövlət proqramı”na daha bir ali məktəbin daxil edilməsi məsələsi nəzərdən keçirilibmi?
- Litva Respublikasının Elm, Təhsil və Ali Məktəblər Nazirliyi ümidvardır ki, gələcəkdə daha çox azərbaycanlı gənc Litvada təhsil almağa üstünlük verəcək. Azərbaycan Prezidentinin təsdiq etdiyi dövlət təhsili proqramına hazırda Litvanın beş universiteti daxil edilib. Litvada təhsil alan gənclərinizə təqaüd almaq imkanı verən bu proqramın siyahısına Litvanın mümkün qədər çox sayda ali məktəbinin daxil edilməsi bizi çox sevindirərdi.
- Hazırda Litvanın ali məktəblərində neçə azərbaycanlı tələbə təhsil alır? Hansı ixtisaslara tələbat daha çoxdur?
- Bütövlükdə Litva universitetlərində hazırda 194 Azərbaycan vətəndaşı təhsil alır. Məsələn, 2014-cü ildə Litvanın ali məktəblərinə Azərbaycandan 85 tələbə daxil olub. Azərbaycanlılar elmin müxtəlif sahələrdə biliklər əldə etmək üçün Litvaya gəlir və çox vaxt “Menecment və biznesin idarə olunması” ixtisasına üstünlük verirlər.
- Bakıda çoxdan olmusunuz? Lütfən, Bakı barədə təəssüratlarınızı bölüşün.
- Mən 2012-ci ildə Bakıya Avropa İttifaqının tibbi kadrların hazırlanması məsələləri üzrə eksperti kimi gəlmişəm. Həkimləri Təkmilləşdirmə İnstitutunda oldum, rektorla görüşdüm, biz neçə xəstəxanaya, o cümlədən hərbi hospitala və Neftçilər Xəstəxanasına baş çəkdim.
Bakıdan xoş təəssüratlarla qayıtdım. Azərbaycanın paytaxtındakı kimi gözəl dəniz sahilini dünyanın heç bir yerində görməmişəm.
Nigar Cəfərli
AZƏRTAC-ın xüsusi müxbiri
Vilnüs
Bölmənin digər xəbərləri
