Dendrologiya İnstitutunun hesabatı: 15 elmi-tədqiqat işi, 6 mühüm nəticə
Bakı, 25 dekabr, AZƏRTAC
Elm və Təhsil Nazirliyinin Dendrologiya İnstitutunun 2023-cü ildəki elmi və elmi-təşkilati fəaliyyətinin yekunları haqqında hesabat tədbiri keçirilib.
Bu barədə AZƏRTAC-a institutdan bildirilib. AMEA-nın vitse-prezidenti akademik İradə Hüseynovanın sədrlik etdiyi iclasda institutun baş direktoru vəzifəsini icra edən, biologiya üzrə fəlsəfə doktoru, dosent Minarə Həsənova hesabat məruzəsi ilə çıxış edib.
Məruzəçi qeyd edib ki, 2023-cü ildə Dendrologiya İnstitutunun 8 laboratoriyasında 3 elmlər və 20 fəlsəfə doktoru tərəfindən 1 problem çərçivəsində, 8 mövzu, 33 mərhələ üzrə 15 elmi-tədqiqat işi aparılıb. 14 iş və 23 mərhələ tamamlanıb. 33 mərhələ üzrə 6 mühüm nəticə əldə edilib. 2023-cü ildə institutun əməkdaşları tərəfindən 1 patent, 4 kitab, yerli 39 məqalə və 55 tezis, o cümlədən xaricdə 32 məqalə və 5 tezis, beynəlxalq bazalarda 30 məqalə dərc etdirilib. İşğaldan azad edilmiş ərazilərin bərpası üzrə Oxçuçay və Bəsitçay Dövlət Təbiət Qoruğunun ekoloji terrora məruz qalan ərazilərinin canlılar aləminin bərpası, ətraf ərazilərində torpaq və bitki örtüyünün taksonomik tərkibinin təhlili, nadir növlərin repatriasiyası, dendroiqlim və dendroxronoloji təhlillərin aparılması, tarixi təbiət abidələrinin inventarlaşdırılması və sertifikatlaşdırılması, Qarabağ ərazilərində bioloji müxtəliflik komponentlərinin nadir növlərinin təbii bərpasının təmin edilməsi, prioritet dendroxronoloji təhlili, meşə fitosenozlarında senopopulyasiyaların müasir vəziyyətinin öyrənilməsi, qorunub saxlanılması və onlardan davamlı istifadə olunması işlərinin aparıldığı vurğulanıb. Bundan başqa, Zəngilan rayonuna ekspedisiya təşkil edilib, İşçi qrup tərəfindən tədqiqat ərazisində monitorinq keçirilərək bitki növlərinin bioloji xüsusiyyətlərinin öyrənilməsi istiqamətində müşahidələr aparılıb. Ərazidə bitki örtüyünün taksonomik tərkibinin təhlili, bitki növlərinin introduksiyası, genofondun bərpası istiqamətində tədqiqatların aparılması, biomüxtəlifliyin genişləndirilməsi və davamlı istifadəsinin həyata keçirilməsi məqsədilə Dendrologiya İnstitutunun təcrübə sahəsində becərilən dekorativ ağac və kol bitki kolleksiyasından (24 növ üzrə 800 bitki) istifadə etməklə Zəngilan rayonunun Ağalı kəndi ərazisində “Yaşıl həyat” layihəsi həyata keçirilib.
Qeyd olunub ki, cari ildə 2 beynəlxalq konfrans və 1 respublika müsabiqəsi keçirilib. Dendrologiya İnstitutu tərəfindən elmlə təhsilin inteqrasiyası istiqamətində 40-a yaxın yerli və xarici elmi-tədqiqat institutu və ali təhsil ocaqları ilə elmi əməkdaşlıq davam etdirilərək müqavilə imzalanıb.
Məruzəçi Dendrologiya İnstitutunun elmlə təhsilin və iqtisadiyyatın inteqrasiyası məqsədilə ali və orta ixtisas məktəbləri, universitetlərlə birgə mütəmadi olaraq ətraf mühitin mühafizəsi istiqamətində ekoloji layihələrin həyata keçirildiyini qeyd edib.
Tədbirdə Bitki mühafizəsi laboratoriyasının aparıcı elmi işçisi AMEA-nın müxbir üzvü Saleh Məhərrəmov, Mərkəzi eksperimental laboratoriyasının müdiri biologiya üzrə fəlsəfə doktoru Hüseynağa Əsədov, Dendroxronologiya laboratoriyasının müdiri professor Ramazan Məmmədov çıxış edərək hesabat ilində görülən işlərdən danışıblar və müəssisənin 2023-cü ildəki fəaliyyətini müsbət qiymətləndiriblər.
Akademik İradə Hüseynova müzakirələrə yekun vuraraq Dendrologiya İnstitutunun hesabatını qənaətbəxş hesab edib, öz tövsiyə və tapşırıqlarını verib.
Bölmənin digər xəbərləri
