Bakı, 3 aprel, AZƏRTAC

XX əsrin sonları dünya nizamında bir çox mühüm hadisələr baş verdi. Həmin hadisələrdən biri də 70 il hökm sürən və 15 müttəfiq respublikanı əsarətində saxlayan SSRİ imperiyasının dağılması idi. Məhvə sürüklənən sovet hakimiyyəti həmin müttəfiq respublikalardan biri olan Azərbaycana növbəti çirkin siyasətini həyata keçirdi. İmperiyanın əli ilə Azərbaycan xalqı deportasiyaya məruz qaldı, soydaşlarımız tarixi torpaqları olan Ermənistandan kütləvi şəkildə qovuldular. Ermənistanın Azərbaycana qarşı ərazi iddialarının yenidən baş qaldırması xalqın etirazına və hiddətinə səbəb oldu. Topxana meşəsi ilə bağlı başlanan 1988-ci ilin meydan hadisələri daha sonra milli-azadlıq hərəkatına çevrildi. Xalqı “Azadlıq meydanı”na çıxaran səbəblərdən biri də mərkəzi hakimiyyətə qarşı qəzəb və kin dalğası idi. Ümummilli Lider Heydər Əliyevin məcburi istefada olduğu və ona qarşı sərt təzyiqlərin davam etdiyi bu vaxtda siyasi meydanda pərakəndəlik özünü büruzə verirdi.

Bu fikirləri AZƏRTAC-a açıqlamasında Milli Məclisin deputatı İqbal Məmmədov səsləndirib.

Deputatın sözlərinə görə, silah gücünə iqtidara gələn AXC-Müsavat cütlüyünün səriştəsizliyi və özbaşınalığı səbəbindən ölkə çətin günlərini yaşadı. Cütlüyün cəmi bir il hökm sürən hakimiyyəti dövründə ölkə anarxiya, xaos, hərc-mərcliklə üz-üzə qaldı. Qanunsuz silahlılar, quldur dəstələri meydan sulayırdılar. Həmin günlərdə məmur özbaşınalığı, korrupsiya, rüşvətxorluq gündəlik həyatın reallığına çevrilmişdi. İqtidarın səriştəsizliyi nəticəsində Azərbaycan iqtisadi böhranın ağır fəsadlarını yaşayır, ölkə parçalanmaq üzrə idi.

AXC-Müsavat cütlüyü təcrübəsizlik, səriştəsizlik, qorxaqlıq və qətiyyətsizlik nümayiş etdirirdi. Məhz bu səbəbdən 1993-cü ilin yayında baş verən hadisələr zamanı ictimai dəstəkdən tamamilə məhrum olmuşdu. Elə xalqın dəstəyini tamamilə itirdiklərinə görə də hakimiyyətdən getməli oldular. Çünki xalq yaxşı bilirdi ki, onlar Azərbaycanın parçalanmasına, dağılmasına, torpaqlarımızın düşmən işğalına məruz qalmasına göz yumaraq var-dövlət yığmaqla, ölkəni talamaqla məşğuldurlar.

“AXC-Müsavat cütlüyünün hakimiyyətdə olduğu dövr Azərbaycan xalqına böyük fəlakətlər gətirdi. Ölkədə ağır iqtisadi vəziyyəti bir yana qoysaq, Ermənistanın ölkəmizə qarşı ərazi iddiası ilə çıxış etdiyi həssas bir məqamda iqtidarın başıpozuqluğu və səriştəsizliyi Azərbaycan xalqına baha başa gəldi. Ərazilərimiz işğal edildi, Meşəli, Cəmilli, Qaradağlı, Xocalı, Ağdaban, Ballıqaya kimi kütləvi qırğın və soyqırımlarına məruz qaldıq. Minlərlə insanımız əsir və girov düşdü və onlardan əksəriyyətindən hələ də xəbər yoxdur. Şuşa, Laçın, Kəlbəcər kimi strateji ərazilərimiz milli xəyanət nəticəsində AXC-Müsavat cütlüyü tərəfindən ermənilərə satıldı. Bir sözlə, AXC-Müsavat cütlüyünün hakimiyyət dövrü Azərbaycan tarixinə ləkə kimi düşdü, o dövrdə milli xəyanətin, buraxılan səhvlərin acı nəticələrini hələ də yaşayırıq”, - deyə İ.Məmmədov qeyd edib.

Deputat bildirib ki, xalqımız və dövlətimiz üçün açıq sınaq günlərində cəbhədə vəziyyət nəzarətdən çıxmışdı. Qarabağın qala qapısı olan Şuşanın işğalı müdafiə naziri Rəhim Qazıyevin xəyanətinin nəticəsi idi. Baş nazir kimi səlahiyyətli vəzifəni icra edən Sürət Hüseynovun, OMON dəstələrinin özbaşınalığı sərhəd tanımırdı. Təbii ki, ölkədəki mövcud vəziyyət Ermənistanın işğalçılıq siyasətinə rəvac verirdi.

“Həmin dövrdə Azərbaycandakı mövcud vəziyyət Ulu Öndər Heydər Əliyevi çox narahat edirdi. Ulu Öndər 1993-cü il yanvarın 27-də Rusiyanın “Nezavisimaya qazeta” nəşrinə verdiyi müsahibəsində 5 ildir ki, Ermənistanla Azərbaycan arasında müharibə getməsinə baxmayaraq, Azərbaycan rəhbərliyinin Qarabağ problemi haqqında konkret və dəqiq konsepsiyası və lazımi hərbi-siyasi strategiyası olmadığından təəssüfləndiyini bildirmişdi. Qarabağ zonasında və başqa sərhəd rayonlarında hərbi əməliyyatların başlı-başına buraxıldığını qeyd edən Heydər Əliyev ölkənin siyasi həyatında isə AXC-nin monopoliyasının hökm sürdüyünü qeyd etdi. Xalqın onlara bu səlahiyyəti həvalə etmədiyini dilə gətirərək vəzifə bölgüsünün AXC-yə mənsubiyyət əsasında bölüşdürülməsini Azərbaycan xalqının gələcəyi üçün böyük təhlükə adlandırdı.

AXC-nin mükəmməl partiya olmadığı qısa fəaliyyəti dövründə 13 siyasi partiyaya parçalanması, daha sonra süqut etməsi ilə sübut olundu. Faktlar sübut edir ki, AXC-nin rəhbərliyində təmsil olunan bir çox şəxslər SSRİ DTK-nın agenti olublar.

Ulu Öndər Heydər Əliyev həmin ildə xalqa müraciəti zamanı bildirdi ki, indiyədək xalqdan çox şey gizlədilib və xalq hər şeyi bilməlidir. Xalqın onu müdafiə edəcəyinə inamını ifadə edən Ümummilli Lider ona görə nə çevrilişdən, nə də terror aktlarından qorxmadığını bildirdi: “Heç bir şeydən qorxmuram. Demişəm və indi də deyirəm: həyatımın bundan sonrakı hissəsini xalqa bağışlamışam”.

“Xalqın tələbi ilə Ümummilli Lider Heydər Əliyevin hakimiyyətə qayıdışından sonra Azərbaycan tarixində yeni səhifə açıldı. Dövlət idarəçiliyində, iqtisadi sahədə dərin böhran aradan qaldırıldı. Ordu quruculuğundan, Azərbaycanın xarici əlaqələrinin yenidən dizayn edilməsindən tutmuş ən xırda məsələlərə kimi bütün sahələrdə qayda-qanunun yaradılması və sonrakı mərhələdə inkişafı təmin edildi.

Dövlət sükanını Ulu Öndərdən qəbul edən Prezident İlham Əliyevin hakimiyyəti illərində Azərbaycan tarixdə olmayan şəkildə güclənməyə nail oldu. Dövlətimizin başçısı ölkəmizin müstəqil, rəqabətədavamlı, güclü ölkəyə çevrilməsini təmin edib. Ölkəmiz müasirləşib, bütün sahələrdə böyük inkişaf yolu qət edilib və Azərbaycan nəinki bölgənin, Avropa regionunun, Türk dünyasının, müsəlman aləminin parlayan ulduzuna çevrilib, dünyada öz layiqli yerini tutub. Bölgə ilə bağlı heç bir təşəbbüs Azərbaycanın razılığı olmadan mümkünsüz prosesə çevrilib.

AXC-Müsavat cütlüyünün milli satqınlığı nəticəsində işğal edilmiş torpaqlarımız 2020-ci ildə Müzəffər Ali Baş Komandan İlham Əliyevin rəhbərliyi ilə düşmən işğalından azad edilib. Bu gün Azərbaycan xalqı qalib xalqdır, qəddini düzəldib, gələcəyə qürurla və inamla baxır, dünyanın müxtəlif ölkələrində yaşayan 50 milyona yaxın soydaşımız, həmvətənimiz, o cümlədən Cənubi Azərbaycandakı azərbaycanlılar İlham Əliyevi öz lideri kimi görür, ona böyük rəğbət bəsləyir. Prezident İlham Əliyev dəfələrlə çıxışlarında bildirib ki, Azərbaycan dövləti dünyadakı bütün azərbaycanlıların qayğılarını öz problemi kimi qəbul edir”, - deyə İqbal Məmmədov bildirib.