Deputat: Azərbaycan torpaqlarını azad etməklə ərazi bütövlüyünü və ədaləti bərpa etmiş oldu
Bakı, 2 oktyabr, AZƏRTAC
Müasir dünyada ikili standartlar, beynəlxalq hüququn normalarına əməl olunmaması qlobal münasibətlər sistemində ədalət prinsipləri üçün böyük təhdiddir. Təəssüf ki, bu cür ədalətsiz münasibətə məruz qalan ölkələrdən biri də Azərbaycan olmuşdur. Belə ki, torpaqlarımızın 30 ilə yaxın müddət ərzində işğal altında qalması beynəlxalq hüququn bütün norma və prinsiplərinə zidd olan bir vəziyyət idi. Əfsuslar olsun ki, beynəlxalq təşkilatlar əzəli və əbədi Azərbaycan torpaqları olan Qarabağı mənfur ermənilərin işğal etmələrinə, bu qədim diyarı viran qoymalarına, tarixi abidələrimizi, milli-mədəni irsimizi məhv etmələrinə, azərbaycanlıların öz doğma yurdlarından didərgin düşmələrinə, onların başına gətirilən müsibətlərə, sərhədboyu ərazilərdə tez-tez törədilən təxribatlara, dinc əhalinin qətlə yetirilməsinə səssiz qalırdılar. Dünya ictimaiyyətinin gözü qarşısında baş verən bu hadisələrə seyrçi münasibət beynəlxalq təşkilatlar tərəfindən ədalət prinsiplərinin pozulmasının bariz nümunəsidir.
AZƏRTAC xəbər verir ki, bu fikirləri Milli Məclisin deputatı Ülviyyə Ağayeva deyib.
O bildirib ki, beynəlxalq vasitəçilər, xüsusilə də münaqişənin həllini öz üzərinə götürən Minsk qrupu Ermənistana vaxtında ciddi təzyiqlər göstərsəydi, təbii ki, Ermənistan məcbur olub işğal etdiyi torpaqlarımızdan çıxacaqdı. Beləliklə, münaqişə sülh yolu ilə öz həllini tapacaq, insan faciələrinin və fəlakətlərinin qarşısı alınacaqdı. Lakin Minsk qrupuna həmsədrlik edən üç dövlətin Birləşmiş Millətlər Təşkilatı Təhlükəsizlik Şurasının daimi üzvü olmasına və dünyanın aparıcı ölkələri hesab edilməsinə baxmayaraq, onlar işğalçı dövlətə heç bir təzyiq göstərmədilər.
“Ümumiyyətlə, hazırda tarixə qovuşmuş Dağlıq Qarabağ münaqişəsinin həll edilməsi üçün vasitəçilik missiyasını yerinə yetirmək məqsədilə yaradılmış ATƏT-in Minsk qrupunun həmsədrləri 30 ilə yaxın davam edən fəaliyyətləri dövründə işğalçını ittiham etməmiş, ədalətin bərqərar olması üçün heç bir addım atmamışlar. Həmsədrlər münaqişə müddətində məsələnin danışıqlar yolu ilə həllinin mümkün olduğunu bildirməklə kifayətlənmişlər”, - deyə deputat vurğulayıb.
Ü.Ağayeva qeyd edib ki, otuzillik işğal dövründə, cəmi iki dəfə ATƏT-in Minsk qrupunun faktaraşdırıcı missiyası Azərbaycanın işğal olunmuş bölgələrinə göndərilib və müvafiq məruzə hazırlanıb. Ermənilərin bütün cinayətləri bu məruzədə öz əksini tapsa da, münaqişənin həlli və işğalçının beynəlxalq hüquq qarşısında cəzalandırılması üçün heç bir tədbir görülməyib. Sonuncu belə bir missiya təqribən 10 il əvvəl həyata keçirilib. Bundan sonra Azərbaycan dəfələrlə Minsk qrupuna, onun həmsədrlərinə yenidən faktaraşdırıcı missiyanın göndərilməsi üçün müraciət etmişdir. Azərbaycanın müraciəti Qarabağda qanunsuz məskunlaşma aparılması, Suriyadan, Livandan və digər ölkələrdən gətirilən ermənilərin Azərbaycana məxsus olan torpaqlarda məskunlaşdırılması ilə bağlı idi. Bütün beynəlxalq konvensiyalara görə bu əməlin hərbi cinayət sayılmasına baxmayaraq, Azərbaycanın müraciəti təmin olunmamış, faktaraşdırıcı missiya Qarabağa göndərilməmişdir.
Deputatın sözlərinə görə, ümumiyyətlə, ATƏT-in Minsk qrupunun 28 illik fəaliyyəti münaqişənin həllinə, Azərbaycanın ərazi bütövlüyünün sülh yolu ilə bərpa olunmasına deyil, münaqişənin dondurulmasına yönəlmişdir: “Əlbəttə ki, Azərbaycan dövləti, Azərbaycan xalqı bu vəziyyətlə, torpaqlarımızın 20 faizinin işğal altında qalması ilə barışmaq fikrində deyildi. İkinci Qarabağ müharibəsi bunu sübut etdi. Bir sıra beynəlxalq təşkilatların 30 il ərzində bərqərar edə bilmədiyi ədaləti Müzəffər Ali Baş Komandanın rəhbərliyi ilə rəşadətli Ordumuz 44 gün ərzində bərqərar etdi. Torpaqlarımız mənfur düşmənin işğalından azad olunaraq, öz sahiblərinə qaytarıldı, münaqişə həllini tapdı. 30 ilə yaxın müddət ərzində BMT-nin Təhlükəsizlik Şurasının sənəd üzərində qalmış qətnamələrini məhz Azərbaycan icra etdi. Ölkəmizin, Ordumuzun qüdrəti bütün dünyaya bir daha bəyan oldu”.
Ülviyyə Ağayeva bildirib ki, beləliklə, ikili standartlara, dünya miqyaslı təşkilatların haqsız mövqeyinə məruz qalan Azərbaycan öz torpaqlarını işğaldan azad etməklə həm ərazi bütövlüyünü, həm də ədaləti bərpa etmiş oldu.
Bölmənin digər xəbərləri
