Deputat: Azərbaycanla Türkiyə arasında əlaqələr unikal müttəfiqlik nümunəsidir
Bakı, 10 mart, AZƏRTAC
Bu gün Azərbaycan-Türkiyə münasibətləri ən yüksək zirvədədir. İki ölkə arasında əlaqələr unikal müttəfiqlik nümunəsidir.
Bu fikirləri AZƏRTAC-a açıqlamasında Milli Məclisin deputatı Sevinc Fətəliyeva deyib.
Deputat bildirib ki, Azərbaycanla Türkiyənin əlaqələri tarixə, eyni soykökə bağlılığa, dostluq və qardaşlıq prinsiplərinə əsaslanır. Ulu Öndər Heydər Əliyevin əbədiyyətə qədər yaşayacaq “Bir millət, iki dövlət” kəlamı münasibətlərin əsasında dayanır. Azərbaycan-Türkiyə qardaşlığının və əməkdaşlığının bütün sahələr üzrə davamlı inkişafına nail olan Prezident İlham Əliyevlə Türkiyə Prezidenti Rəcəb Tayyib Ərdoğanın dövlətlərarası səviyyədə olduğu kimi, şəxsi münasibətlərdə də əsl qardaşlıq nümayiş etdirmələri çox mühüm əhəmiyyətə malikdir. Prezident İlham Əliyevin dediyi kimi, Türkiyə-Azərbaycan dostluğu sarsılmazdır, əbədidir. Hər iki ölkənin rəhbərliyinin sıx münasibətləri xalqlarımız üçün də, dünya birliyi üçün də nümunədir. Şuşa Bəyannaməsinin imzalanması ilə strateji müttəfiqlər olan Azərbaycanla Türkiyə bütün məsələlərdə daim bir-birinin yanında durduqlarını nümayiş etdirir. Martın 5-də İğdır-Naxçıvan qaz kəmərinin istifadəyə verilməsi isə Azərbaycan-Türkiyə qardaşlıq münasibətlərinin növbəti ifadəsidir. Bu layihənin təkcə sosial-iqtisadi deyil, siyasi əhəmiyyəti də böyükdür. Ankarada İğdır-Naxçıvan qaz kəmərinin videobağlantı formatında keçirilən açılış mərasimində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın iştirakı da layihənin önəmini təsdiqləyir.
S.Fətəliyevanın sözlərinə görə, İğdır-Naxçıvan qaz boru kəməri layihəsi Naxçıvanın qaz təchizatını şaxələndirməklə yanaşı, həm Naxçıvan, həm də İğdır əhalisinin rifahına xidmət edəcək. Mərasimdə Prezident İlham Əliyevin dediyi kimi: “Bir əsrdən çoxdur ki, Naxçıvan Azərbaycanın əsas hissəsindən ayrılıb. Bunun səbəbi ondan ibarətdir ki, Azərbaycan Xalq Cümhuriyyəti 1920-ci ildə süqut edəndən beş ay sonra sovet hakimiyyəti Qərbi Zəngəzuru Azərbaycandan ayırıb Ermənistana birləşdirdi və beləliklə, Azərbaycanın əsas hissəsi ilə onun ayrılmaz hissəsi olan Naxçıvanla quru bağlantısı pozulub. Bir əsrdən çox davam edən bu ədalətsizlik Naxçıvanda yaşayan bizim soydaşlarımızın həyatına çox mənfi təsir göstərmişdir. Xüsusilə Birinci Qarabağ savaşı başlayan kimi Ermənistan Qarabağı işğal etdi və eyni zamanda, Naxçıvanı blokadaya aldı”.
Deputat söyləyib ki, 44 günlük Vətən müharibəsindən sonra Ermənistan üçtərəfli bəyanat əsasında Naxçıvana maneəsiz gediş-gəliş üçün öhdəlik götürüb. Lakin rəsmi İrəvan Zəngəzur dəhlizi adlandırdığımız layihənin reallaşmasına hələ də əngəl olur. Amma gec-tez bu tarixi ədalətsizlik aradan qaldırılmalı, Zəngəzur dəhlizi açılmalıdır.
Mərasimdə Prezident Rəcəb Tayyib Ərdoğan isə Türkiyə və Azərbaycan sülhün, sabitliyin, rifahın tərəfində olduğunu söyləyərək deyib: “Bölgəmizdə ancaq sülh istəyirik, əməkdaşlıq istəyirik, hamımızın birlikdə inkişaf etməsini istəyirik. Bu məqsədlə indiyədək bir sıra addımlar atdıq, səmimiyyətimizi göstərdik. İnşallah, bundan sonra regional sülh, rifah və əmin-amanlıqla bağlı hər cür layihəni birlikdə həyata keçirməkdə qətiyyətliyik”.
Sevinc Fətəliyeva qeyd edib ki, Azərbaycan və Türkiyənin birgə əməkdaşlığı çərçivəsində həyata keçirdiyi qlobal layihələr regionun inkişafına töhfə verməklə yanaşı, Avropanın enerji təhlükəsizliyinin təmin olunmasında da mühüm rol oynayır. Qırx dörd günlük müharibə zamanı dost, qardaş Türkiyənin xalqımıza qəti siyasi və mənəvi dəstəyi Azərbaycanın işğalçı Ermənistan üzərində qələbəsində əhəmiyyətli rol oynadı. Eləcə də iki il əvvəl qardaş ölkədə baş vermiş güclü zəlzələ ilə bağlı Azərbaycan öz qardaşlıq dəstəyini əsirgəmədi. Bütövlükdə Azərbaycanla Türkiyə arasındakı münasibətlər iki ölkənin ortaq tarixindən, mədəniyyətindən və dilindən qaynaqlanaraq, beynəlxalq səviyyədə güclü strateji əməkdaşlığa çevrilib. Türk dünyası daxilində ölkələrimiz arasında möhkəmlənən əməkdaşlıq yalnız iki dövlətin deyil, bütün Türk dünyasının birliyinə və inkişafına töhfədir.
Bölmənin digər xəbərləri
