Bakı, 6 oktyabr, AZƏRTAC

Azərbaycanın razılığı ilə bölgədə monitorinq aparan BMT missiyası məlumat yayıb. Məlumatda etnik təmizləmənin olmadığı, hökumətimizin Qarabağda səhiyyə və digər sahələrdə fəaliyyətə başladığı, heç bir mülki infrastruktura zərər dəymədiyi bildirilir. Bu, Azərbaycanı ittiham edən xarici qüvvələrin niyyətini iflasa uğratdı.

Bu fikirləri AZƏRTAC-a açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.

Azərbaycanın rəşadətli Ordusunun Qarabağda qanunsuz erməni hərbi birləşmələrinə qarşı həyata keçirdiyi lokal antiterror tədbirləri xalqımız tərəfindən böyük qürur hissi ilə qarşılandığını bildirən deputat sözlərinə qeyd edib ki, Silahlı Qüvvələrimizin həyata keçirdiyi antiterror tədbirləri nəticəsində qarşı tərəf qısa müddətdə ağ bayraq qaldırmağa məcbur oldu. Antiterror tədbirlərindən sonra dövlətimiz öz suverenliyini tam təmin etdi.

“Qazanılan Zəfər Azərbaycan Prezidentinin dəmir iradəsinin, qətiyyətinin və milli maraqlarımızı dönmədən qorumasının, eləcə də şanlı ordumuzun gücünün parlaq ifadəsidir. Hazırda Qarabağ ərazisində dövlətimiz tərəfindən nizam-intizam yaradılır, müvafiq qurumların əməkdaşları aidiyyəti üzrə öz vəzifələrini yerinə yetirirlər. Bəzi beynəlxalq təşkilatlar və ölkələr bu məsələdə Azərbaycana qarşı qarayaxma kampaniyası apararaq “etnik təmizləmə”də ittiham etməyə çalışır. Amma dövlətimiz öz qanuni addımları ilə həmin iddiaları ifşa edir.

Dövlətimiz reinteqrasiya prosesinə start verib. Ermənistan Qarabağ ermənilərindən istifadə edərək “etnik təmizləmə” şousu yaratmaq istəyir. Bununla da, Azərbaycana qarşı beynəlxalq təzyiqlərin göstərilməsinə çalışır. Lakin bu cəhdlər əbəsdir. Azərbaycan Qarabağ ermənilərinə qarşı heç bir addım atmır, əksinə, onların vətəndaşlıqla bağlı məsələlərini həll etmək üçün praktiki addımlar atır. Lakin bu, o demək deyil ki, Azərbaycan xalqına qarşı, ərazi bütövlüyümüzə qarşı və s. cinayətlər törətmiş şəxslər cəzasız qalacaq”, - deyə S.Fətəliyeva diqqətə çatdırıb.

Deputat qeyd edib ki, dövlətimizin güc strukturları bu istiqamətdə lazımi addımlar atır. Ruben Vardanyanın, qondarma rejimin “keçmiş prezidentləri” Arkadi Qukasyanın, Bako Saakyanın, Arayik Arutyunyanın, daşnak David İşxanyanın, eləcə də bir neçə yüksək rütbəli hərbçilərin həbs edilməsi bunu təsdiqləyir. Onların arasında birbaşa əli günahsız azərbaycanlıların qanına batmış cinayətkarlar var. Hazırda Ermənistan hakimiyyəti bu cinayətkarların həbs edilməsindən də “siyasi şou” düzəltməyə çalışır. Amma heç nəyə nail ola bilməyəcəklər.

“Azərbaycan güclü dövlətdir, ona heç bir qüvvə nəyisə diktə edə bilməz. Həmin şəxslərin həbs olunması Azərbaycan qanunvericiliyi ilə yanaşı, beynəlxalq hüquqa da tamamilə uyğundur. Xalqımıza qarşı cinayətlər törədənlər, günahsız insanları qətlə yetirərək özlərinin “xoşbəxtliyini” qurduqlarını hesab edən bu canilər tarixi ədalətin öz yerini tutacağını düşünməli idilər. Artıq zaman o zamandır ki, onlar layiqli cəzalarını alacaqlar”, - deyə Sevinc Fətəliyeva vurğulayıb.