SİYASƏT
Deputat: Bu gün müharibənin bitmədiyini bildirən dövlətlər “Dəmir yumruq” əməliyyatını unutmamalıdır
Bakı, 1 oktyabr, AZƏRTAC
Qırx dörd günlük İkinci Qarabağ müharibəsinin başlanmasının birinci ildönümünü qeyd edirik. Dövlətimizin başçısı, Müzəffər Ali Baş Komandan İlham Əliyevin Anım Günü ilə əlaqədar xalqa müraciətində, eyni zamanda, Rusiyanın nüfuzlu “Nasionalnaya oborona” jurnalına, Türkiyənin Anadolu Agentliyinə, Fransanın “France 24” televiziya kanalına müsahibələrində 30 illik işğal dövründə dünyanın ikili standartlara söykənən siyasətinin yaratdığı problemlərə diqqəti yönəldərək bu fikri xüsusi qeyd edir ki, artıq münaqişə tarixə qovuşub, “Dağlıq Qarabağ” deyilən ərazi vahidi yoxdur, Cənubi Qafqazı daha da proqnozlaşdırıla bilən, sabit və təhlükəsiz regiona çevirmək üçün yeni fəaliyyətə başlamalıyıq. Prezident İlham Əliyevin işğalçı dövlətə çağırışları sırasında bu məqam da xüsusi yer alır ki, keçmişlə deyil, gələcəklə yaşamaq lazımdır. Münaqişənin həllində vasitəçilik missiyasını yerinə yetirən ATƏT-in Minsk qrupunun həmsədrləri bu gün də yanaşmalarında ədaləti, beynəlxalq hüququn norma və prinsiplərini arxa plana keçirir, Ermənistanın münaqişənin hələ də həll olunmaması barədə sərsəm fikirlərinə dəstək verirlər.
AZƏRTAC xəbər verir ki, bu fikirləri Milli Məclisin deputatı Cavanşir Paşazadə söyləyib.
C.Paşazadə qeyd edib ki, ATƏT-in Minsk qrupunun həmsədr dövlətlərinin, xüsusilə ABŞ-ın və Fransanın münaqişənin həll olunmaması ilə bağlı səsləndirdikləri fikirlər birmənalı qarşılana bilməz. İyirmi səkkiz il vasitəçilik missiyasını yerinə yetirərkən bir dəfə də olsun missiyalarının mahiyyətini dərindən dərk etməyən, Ermənistana dəstək verməklə onun illər keçdikcə yeni ərazilər uğrunda müharibə planına dəstək verən bu dövlətlər bu gün işğalçının düşdüyü ağır vəziyyətdən nəticə çıxarmalıdırlar. Çünki Azərbaycan dövləti daim bəyan edirdi ki, torpaqlarımızın işğalı ilə barışmayacaq, sülh danışıqları səmərə verməyəcəyi təqdirdə, hərb yolunun seçiləcəyi şəksizdir. Otuz ilə yaxın dövrdə səbir, təmkin nümayiş etdirən Azərbaycan artıq ötən ilin bu günlərində Ermənistanın təxribatlarının qarşısını qətiyyətlə almaq üçün Vətən müharibəsinə başladı, 44 gündə düşməni yerinə oturtdu, ədaləti bərpa etdi. Eyni zamanda, dünyaya nümayiş etdirdi ki, beynəlxalq hüququn norma və prinsipləri mövcuddur, onlar yerinə yetirilməlidir. Bu norma və prinsiplərin tətbiqi üçün vahid mexanizm olmalıdır.
Deputat dövlətimizin başçısı İlham Əliyevin Fransanın “France 24” televiziya kanalına müsahibəsində diqqət yönəltdiyi bu məsələni də xüsusi qeyd edib ki, rəsmi Bakı istər işğal illərində, istərsə də hazırkı dövrdə Azərbaycan ərazisində ikinci erməni dövlətinin yaradılmasına imkan verməyəcək. Prezident İlham Əliyevin qeyd etdiyi kimi, məsələnin həll edilmədiyini deyən ölkələr yaxşı olar ki, öz ərazilərində erməniləri yerləşdirmək və ikinci Ermənistan dövləti yaratmaq üzərində düşünsünlər. Niyə onlar hesab edirlər ki, hər hansı hüquqi, siyasi və tarixi əsaslar olmadan Azərbaycan ərazisində ikinci erməni dövləti yaradılmalıdır? Münaqişə həll edilməyib deyənlər göstərsinlər ki, problem necə həll olunmalıdır. “Dağlıq Qarabağ” dedikdə onlar nəyi nəzərdə tuturlar? Hansı sərhədlər çərçivəsində, hansı ərazidə, hansı formada? Minsk qrupunun həmsədrləri 28 il sürən mənasız danışıqlarda Azərbaycanın mövqeyindən çox yaxşı xəbərdardırlar. Dövlətimizin başçısı İlham Əliyev 44 günlük İkinci Qarabağ müharibəsinin getdiyi dövrlərdə də hansı şərt daxilində müharibəni saxlamağın mümkünlüyünü bəyan edirdi. Amma qarşı tərəf elə düşünürdü ki, Azərbaycan Ordusu Ermənistanın himayədarları tərəfindən silahlandırılmış ordusu qarşısında zəif olacaq. Amma unudurdular ki, Azərbaycan Birinci Qarabağ müharibəsi dövründəki Azərbaycan, Silahlı Qüvvələrimiz o dövrün ordusu deyil. Azərbaycan bu illər ərzində gücləndi, Ordumuz Qələbəyə hazırlandı, məsələnin həlli üçün hüquqi baza formalaşdı. Azərbaycanın 44 gündə 30 ilin işğalına son qoyması Ermənistana və ona havadarlıq edənlərə ciddi dərs olmalıdır. Bu gün müharibənin bitmədiyini bildirib, vəziyyəti gərginləşdirmək yolunu tutan dövlətlər yaxşı olardı ki, “Dəmir yumruq” əməliyyatını unutmayaraq Azərbaycanın Ermənistana təklif etdiyi sülh müqaviləsini imzalamasına dəstək versinlər, bununla da regionda təhlükəsizliyi, sülhü təmin etsinlər.
Azərbaycanın qarşıya qoyduğu bütün hədəflərə yüksək səviyyədə nail olduğunu vurğulayan C.Paşazadə deyib: “Buna əsas verən möhkəm təmələ əsaslanan siyasətdir. Ümummilli Liderin siyasi kursunu uğurla davam etdirən Prezident İlham Əliyev qətiyyəti sayəsində çoxəsrlik dövlətçilik tariximizə Zəfər səhifəsini yazmaqla qarşıdakı illərin perspektivlərini açıqladı. Müzəffər Ali Baş Komandan İlham Əliyevin böyük qürurla qeyd etdiyi kimi, bundan sonra qalib ölkə, müzəffər xalq kimi yaşayacağıq və azad edilmiş torpaqları quracağıq, bərpa edəcəyik. O torpaqlara artıq həyat qayıdır”.
Tarixi Zəfəri bizə bəxş edən qəhrəman əsgər və zabitlərimizin qürur mənbəyimiz olduğunu vurğulayan deputat bildirib ki, onların qəhrəmanlığı, şücaəti, fədakarlığı artıq dastana çevrilib. “Azərbaycan Ordusu Ermənistan silahlı qüvvələrini diz çökdürdü, onların hərbi texnikasını, silah-sursatını məhv etdi və qənimət kimi götürdü, illərdir formalaşan “yenilməz erməni ordusu” mifini dağıtdı. Ordumuz dünyanın hərb tarixinə yeni səhifə yazdı. Bu gün dünya ekspertləri müharibə təcrübəmizi öyrənir, onların dərsliklərə salınmasının vacibliyini önə çəkirlər. Bu, Azərbaycan dövlətinin təkmil, zamanın və dövrün tələblərinə uyğun həyata keçirdiyi islahatların, ən əsası, dövlətin, xalqın maraqlarını hər şeydən üstün tutmasının nəticəsidir. Bu gün dövlət başçısı İlham Əliyevin xarici mətbuata müsahibələri fonunda artıq tarixə qovuşan Dağlıq Qarabağ münaqişəsinin həllində 30 ilə yaxın vasitəçilik missiyasını yerinə yetirən, amma fəaliyyətsizliyi ilə diqqət çəkən ATƏT-in Minsk qrupunun həmsədrlərinin hazırda vəzifələri açıqlanır”, - deyə o əlavə edib.