Deputat: Ermənistanın faşizmə pərəstiş etməsi artıq danılmaz fakta çevrilib
Bakı, 30 sentyabr, AZƏRTAC
Ermənistan Respublikası işğalçılıq siyasətini davam etdirərək dəfələrlə təxribatlar törətmiş, atəşkəs rejimini pozmuş, öz mənfur niyyətlərini nümayiş etdirmişdir. Sentyabrın 27-də baş verən hadisələr də buna növbəti sübutdur. Gecə saatlarından başlayaraq Ermənistanın işğalçı ordusu Azərbaycanın Qarabağ istiqamətində sərhədlərimizə ağır artilleriya atəşi açaraq hücum etmişdir. Azərbaycanın Milli Ordusu dərhal əks-hücuma başlamış və bir sıra strateji əhəmiyyətli mövqeləri, o cümlədən bəzi kəndlərimizi erməni işğalçılarının əsarətindən geri alaraq öz nəzarəti altına keçirmişdir.
Bu fikirləri AZƏRTAC-a Milli Məclisin deputatı Ülviyyə Ağayeva deyib.
Deputat bildirib ki, bu gün Ermənistanın faşizmə pərəstiş etməsi artıq danılmaz fakta çevrilib. Baş vermiş hadisələrdə Ermənistan tərəfi Azərbaycanı təqsirləndirsə də, onların işğalçı bir ölkə olaraq birinci hücum etməsi və Azərbaycanın buna cavab olaraq müdafiə məqsədli əks hücumu da bunu sübut edir. Dünyada siyasi nüfuzu və çəkisi olan bir sıra ölkələrin rəhbərləri baş verən hadisələrin sülh və danışıq yolu ilə həll edilməsinə meyilli olsalar da, nədənsə bu günə kimi təcavüzkara tam təzyiq göstərilməmiş, qəbul edilmiş sənədlərin göstərişlərinə əməl etməsi tələb olunmamışdır. 30 ilə yaxın bir dövrdə beynəlxalq qətnamələr kağız üzərində qalmışdır. Bütün bu ikili siyasətlərə baxmayaraq, heç kim inkar edə bilmir ki, Ermənistan işğalçıdır, Azərbaycan isə tarixi ədalətin bərpası uğrunda mübarizə aparır və tarixi torpaqlarını geri qaytarmağa çalışır. Bütün dünya bilir ki, Qarabağ Azərbaycandır, bu fakt həqiqətdir və xalq bu həqiqət uğrunda mübarizə aparmağa hazırdır. Haqq işi uğrunda mübarizə əzmində olan Azərbaycan xalqının və dövlətimizin səbri tükənmişdir. Bu dəfə təcavüzkara və onun havadarlarına daha ciddi mesaj verilmişdir: biz geri çəkilməyəcəyik.
Azərbaycan Respublikasının Prezidenti İlham Əliyev dövlətimizin humanistliyini və yalnız tarixi ədalət, torpaqlarımızı işğaldan azad etmək mövqeyini, dövlətimiz və xalqımızın sülh tərəfdarı olduğunu hər zaman nümayiş etdirir. Milli Ordumuz təcavüzkardan fərqli olaraq, beynəlxalq normalara əməl edir, mülki əhalini atəşə tutmur, hətta dövlətimiz Xankəndinin erməni sakinlərinə də müraciət ünvanlayaraq bildirmişdir ki, bizim hədəfimiz yalnız işğalçı ordu və onun döyüşçüləridir və Azərbaycan ordusu heç vaxt mülki əhaliyə (düşmən tərəfdə olsa da) və onun infrastrukturlarına atəş açmayacaq. Mülki əhalinin narahat olmasına heç bir əsas yoxdur. Halbuki bunun tam əksi olaraq, təcavüzkar ölkə, dinc əhalinin yaşayış yerlərini, infrastrukturları ağır artilleriya atəşinə tutur və bu, birinci dəfə deyil, Xocalı soyqırımı, Tovuz hadisələrində, bu günlərdə də Ermənistanın əsas hədəfi bizim yaşayış məntəqələrimizdir. Bunun nəticəsində bu günlərdə mülki əhali arasında xeyli yaralanan və həlak olan vətəndaşlarımız olub. Naftalanda bütövlükdə bir ailənin üzvləri, o cümlədən iki məktəbli bu təcavüzün qurbanı olmuşdur. Özünü bütün dünyaya daim günahsız qurban kimi qələmə verən ermənilər bir tərəfdən ikili siyasətlərini nümayiş etdirir, digər tərəfdən, Azərbaycan ictimaiyyəti, Azərbaycan vətəndaşları arasında, təşviş yaratmaq məqsədi güdürlər.
Azərbaycan hökuməti hər zaman olduğu kimi, bu gün də xalqa arxalanır: hadisələrin gedişatı ilə bağlı xalqa daim rəsmi məlumat verilir, ordumuzun nailiyyətləri dərhal xalqın diqqətinə çatdırılır. Bu, bir daha sübut edir ki, xalq öz ordusuna etibar edir və onun ordu ilə birliyi sarsılmazdır. On minlərlə insanın orduya könüllü kimi yazılması, eləcə də təxribatlar zamanı öz evlərini tərk etməməsi Azərbaycanda xalq-ordu birliyi və orduya olan inamdan xəbər verir. Bu gün Azərbaycan bütün dünyaya güclü dövlət və güclü ordusunun olduğunu nümayiş etdirir.
Dağlıq Qarabağ mübarizəsi ümumxalq mübarizədir. Müharibədə itki qaçılmazdır. Müharibə sevindirici hadisə deyil. Ancaq budəfəki döyüşlərin başlanması maraqlı bir hal nümayiş etdirdi: hamını bu müharibənin başlanması xəbəri sevindirdi, çünki artıq başqa çıxış yolu görmürük.
Prezidentimiz İlham Əliyevin dediyi kimi, “bizim digər ölkənin torpaqları ilə işimiz yoxdur”, “bizim yolumuz haqq yoludur! Mən Azərbaycan xalqına bu məlumatı verməklə bir daha demək istəyirəm ki, biz haqq yolundayıq, biz özümüzü müdafiə edirik. Biz heç kimin torpağına göz dikməmişik, heç kimin torpağında, Ermənistan ərazisində Azərbaycan silahlı birləşmələrinin heç bir məqsədi, hədəfi yoxdur. Ancaq biz öz torpağımızda özümüzü müdafiə edəcəyik və işğal edilmiş torpaqlarımızı işğalçılardan azad edəcəyik”.
Bölmənin digər xəbərləri
