Deputat: Qalib statuslu Azərbaycan gəncliyi bizim qürurumuzdur
Bakı, 31 yanvar, AZƏRTAC
Bütün xalqlar üçün gənclik özünün varlığını yaşatmaq, gələcəyini təmin etmək baxımdan başlıca amildir. Bu istiqamətdə müstəqillik dövründə Azərbaycan cəmiyyətində gəncliyə strateji önəm verilməsi yaxın tarixdir. Gəncliyin Azərbaycan cəmiyyətində layiqli yer tutmasının dövlət siyasəti səviyyəsinə yüksəldilməsi məhz Ümummilli Lider Heydər Əliyevin ölkəyə rəhbərliyinin hər iki dövründə gerçəkləşdirdiyi tarixi tədbirlərlə bağlıdır. Ulu Öndərin 1969-cu ildə hakimiyyətə gəlişi ilə bütün sahələrdə milli inkişaf hədəfə alındığı kimi, gənclərin də həyatı, qayğı və problemləri diqqət mərkəzində oldu.
Bu fikirləri AZƏRTAC-a açıqlamasında Milli Məclisin deputatı, YAP İdarə Heyətinin üzvü Rəşad Mahmudov bildirib.
O vurğulayıb ki, fəaliyyətində xalqının maraqlarını əsas götürən Ümummilli Lider, ilk növbədə, Azərbaycan gəncliyinin təhsilinə önəm verərək müasir dövrün tələbləri səviyyəsində kadrların yetişməsi üçün bütün imkanları səfərbər etdi. Azərbaycanı gənclər ölkəsi, gəncləri isə Azərbaycanın gələcəyi adlandıran Ulu Öndər bu məqsədlə minlərlə azərbaycanlı gəncin keçmiş SSRİ-nin nüfuzlu ali məktəblərində təhsil almasına nail oldu. O zaman və sonrakı müstəqillik dövründə Azərbaycanda taleyüklü nailiyyətlərinin əldə olunması məhz həmin gənclərin yüksək hazırlığı nəticəsində mümkün oldu.
Ümummilli Liderin ölkə rəhbərliyindən kənarda olduğu dövrdə gənclərlə bağlı dövlət siyasətində ciddi boşluq yaranmışdı. Ulu Öndər hakimiyyətə qayıtdıqdan sonra gənclər yenidən ictimai həyatda layiqli yer tutmağa başladı. Müstəqil Azərbaycanda Ümummilli Lider Heydər Əliyevin gənclər siyasəti ilə bağlı fəaliyyəti, insan kapitalının formalaşmasına yönəlik tarixi qərarları isə bugünkü tərəqqi və yüksəlişin təmin edilməsinə xidmət göstərir.
Böyük liderin birbaşa rəhbərliyi ilə müstəqilliyimizin ilk illərində gənclərimizin xarici ölkələrin nüfuzlu ali məktəblərində təhsil almalarına şərait yaradılması, onların qayğı və ehtiyaclarının dövlət tərəfindən cavablandırılması, istedadlı və bacarıqlı kadrların dövlət qulluğunda irəli çəkilməsi Azərbaycan gəncliyini yeni yüksəliş yoluna çıxardı. Bundan başqa, dövlət orqanlarının gənclərlə iş sahəsində fəaliyyətini əlaqələndirmək məqsədilə Ulu Öndərin 1994-cü il 26 iyul tarixli Fərmanı ilə Gənclər və İdman Nazirliyinin yaradılması, onlarla bağlı bir çox önəmli tədbirlər respublikanın ictimai-siyasi həyatında gənclərin daha fəal iştirakı üçün şərait yaratdı. Gənclər siyasətinin məqsəd, prinsip və istiqamətləri, habelə təşkilati-hüquqi əsasları yenidən müəyyən olundu.
“Ümummilli Liderin canından artıq sevdiyi Azərbaycanı 2003-cü ildə ölkə gəncliyinin lider yetirməsi olan İlham Əliyevə etibar etməsi gəncliyə ən böyük qiymət və etimad oldu. Böyük siyasətçi və müdrik dövlət xadimi Heydər Əliyevin mükəmməl idarəçilik məktəbinin layiqli davamçısı olan Prezident İlham Əliyevin də siyasətində gəncliyə diqqət və qayğı üstün istiqamət kimi davam etdirildi.
Gəncliyə Heydər Əliyev himayəsi ənənəsinin davamı olaraq dövlətimizin başçısı 2007-ci ili “Gənclər ili” elan etdi. Prezident İlham Əliyev gənclərin ölkənin ictimai-siyasi və mədəni həyatında fəallığını təmin etmək üçün növbəti addımlar atdı. Dövlətimizin başçısının daxili siyasətində önəmli hədəf olan “Qara qızıl”ın insan kapitalına çevrilməsi strategiyası gənclərin mükəmməl tərbiyəsində və yetkinləşməsində xüsusi önəm kəsb etdi. Bu sahədə xarici ölkələrdə təhsil alıb müstəqil Azərbaycana xidmət edən və ölkədə yüksək təhsil alan mütəxəssislərə geniş meydan verildi.
İdmana dövlət qayğısı isə dünyanın hər yerində üçrəngli bayrağımızı ucaldan idmançılar yetişdirilməsini təmin etdi. Prezident İlham Əliyevin bu siyasətinin nəticəsi olaraq Azərbaycan gəncliyi xilaskar döyüşçülər nəsli kimi bayrağımızı həm də Qarabağın işğaldan azad edilmiş şəhər və kəndlərində, Zəfər zirvəsi Şuşada ucaldaraq milli qürur mənbəyi oldu. 44 günlük şanlı müharibədə dünya bir daha Azərbaycan gəncinin qüdrətinin, Vətənə olan sədaqətinin şahidi oldu”, - deyə deputat vurğulayıb.
Rəşad Mahmudov sonda qeyd edib: “Zəfər savaşında müqəddəs Azərbaycan bayrağı gənclərimizi Qələbəyə ruhlandırdı. Hamı, hətta düşmən ölkə etiraf etdi ki, Vətəni Azərbaycan gəncləri kimi sevmək heç də asan deyil.
Bu müqəddəs Vətən sevgisi ilə ölkəmiz Prezident İlham Əliyevin Komandanlığı altında qalib gəldi.
Günümüzün qalib statuslu Azərbaycan gəncliyi bizim qürur mənbəyimizdir. Gənclərimiz bu günümüzün layiqli vətəndaşları və gələcəyimizin etibarlı təminatçılarıdır. Onların varlığı və mübarizəsi Azərbaycanın daha xoş sabahı, etibarlı gələcəyi deməkdir. Gənclik bu gündən sabaha canlı körpüdür. Biz haqlı olaraq gənclərimizlə fəxr edir, gələcək Azərbaycan naminə onlara böyük ümidlər bağlayırıq”.
Bölmənin digər xəbərləri
