Deputat: Vətən müharibəsində Zəfərimiz Ordumuzun qüdrətinin və xalqımızın milli birliyinin təntənəsi oldu
Bakı, 1 oktyabr, AZƏRTAC
Ötən ilin 27 sentyabr günü Azərbaycanın 30 illik torpaq həsrətinə son qoymaq üçün haqq yolunda səfərə çıxdığı, haqq uğrunda ayağa qalxdığı gün kimi tarix salnaməmizə əbədi həkk olundu. O gün Ermənistanın növbəti hərbi təxribatı, bütün cəbhəboyu ağır artilleriyadan istifadə etməklə hücuma keçməsi və birbaşa mülki əhalini hədəfə alması, səbrimizi daşıran son damla oldu və müharibəni qaçılmaz etdi.
Vətən müharibəsində qazanılan möhtəşəm Qələbə Prezident İlham Əliyevin yenilməz qətiyyətinin, Ali Baş Komandanı olduğu Ordumuzun qüdrətinin və xalqımızın milli birliyinin təntənəsi oldu.
Vətən torpaqlarının azadlığı uğrunda davam edən bu savaş milli həmrəyliyimizin rəmzinə çevrildi, tariximizə qürur mənbəyimiz kimi həkk olundu. Möhtəşəm zəfər tariximizi, dövlətçilik irsimizi daha da şərəfləndirdi. Bu Qələbə dövlətimizin qüdrətini bütün dünyaya nümayiş etdirdi. Xalqımız öz haqqı uğrunda mübarizə aparmaq əzmini nümayiş etdirdi, məğlubiyyət damğasını üzərindən götürdü. Bu savaşın nəticəsində dünya bizi həm də qalib dövlət, məğrur xalq kimi tanıdı.
Bu fikirləri AZƏRTAC-a açıqlamasında Milli Məclisin deputatı Anar Məmmədov söyləyib.
Azərbaycan Ordusunun dünyanın hərb tarixinə yeni səhifə yazdığını vurğulayan deyən deputat bildirib ki, bu gün dünyanın inkişaf etmiş ölkələrində Azərbaycanın müharibə təcrübəsi öyrənilir. Müasir texnologiyalardan istifadə olunan əks-hücum əməliyyatlarında rəşadətli Azərbaycan Ordusunun göstərdiyi qəhrəmanlıq, şücaət sayəsində 44 günün hər günü tariximizin şanlı səhifəsi kimi yazıldı. Ermənistan ordusu şanlı Azərbaycan Ordusu tərəfindən istər texnika, istərsə də canlı qüvvə sarıdan tamamilə darmadağın edilsə də təəssüf ki, xalqımız da şəhidlər verdi. Təsəllimiz isə odur ki, ümumilikdə Qarabağ savaşı başlayan gündən bu günədək həlak olan soydaşlarımızın, Xocalı və digər ərazilərdəki soyqırıma məruz qalan günahsız insanların, raket zərbələri nəticəsində həyatını itirmiş mülki vətəndaşlarımızın, şəhidlərimizin qanı yerdə qalmadı. Düşməndən intiqamımızı həm torpaqlarımızı geri almaqla, həm də düşməni məhv etməklə aldıq. “Dəmir yumruq” əməliyyatında məğlub olan Ermənistan baş naziri Paşinyanın simasında Rusiya Prezidenti Vladimir Putinin vasitəçiliyi və iştirakı ilə təslim Bəyanatını imzalayaraq Azərbaycan Prezidentinin qarşısında diz çökdü, qalan üç rayonu və ətraf əraziləri qısa müddət ərzində könüllü olaraq Azərbaycana təhvil vermək barədə öhdəlik götürdü.
“Azərbaycan Respublikasının Prezidenti İlham Əliyevin 2020-ci ilin 2 dekabr tarixli Sərəncamı ilə 27 sentyabr tarixi respublikamızda Anım Günü kimi təsis edildi. Şanlı Qələbəmizə birinci ildönümündə bütün ölkə ərazisində anım tədbirləri keçirilir, şəhidlərimizin əziz xatirəsi yad edilir. Eyni zamanda, dövlətimizin başçısı da Anım Günü münasibətilə xalqa müraciət edərək vacib fikirlər səsləndirib, həm ölkə daxilində, həm də ölkə xaricində diqqətlə izləniləcək, təhlil olunacaq əhəmiyyətli mesajlar verib”, - deyə A.Məmmədov vurğulayıb.
Deputat qeyd edib ki, Prezident İlham Əliyev sentyabrın 28-də Türkiyənin Anadolu Agentliyinə müsahibəsi zamanı da burada həyata keçirilən bütün layihələrin vətəndaşlarımız üçün olduğunu söyləyib: “...Təbii, biz bunu, ilk növbədə, öz vətəndaşlarımız üçün edirik ki, bu bölgəni yenidən quraq və keçmiş məcburi köçkünlər tezliklə oraya qayıda bilsinlər...” Qanları yerdə qalmadığı, qisasları alındığı üçün indi bütün şəhidlərimizin ruhu şaddır. Eyni zamanda, Azərbaycan xalqı çox qürurludur ki, qəhrəman oğulları, qızları var və məhz bu şanlı Qələbəni həmin igidlərin şücaəti, fədakarlığı sayəsində qazanmışıq.
“Prezident İlham Əliyevin də söylədiyi kimi, bundan sonra dünya durduqca qalib ölkə, müzəffər xalq kimi yaşayacağıq. Müzəffər Ali Baş Komandan İlham Əliyevin qətiyyətli, prinsipial və uzaqgörən siyasəti, dövlət və xalqın sarsılmaz birliyi, şanlı Ordumuzun gücü sayəsində Qələbə coşqusu yaşayan Azərbaycanın azad edilmiş torpaqlarında indi sürətli quruculuq, bərpa işləri aparılır. Artıq o torpaqlara həyat qayıdır, illər əvvəl dədə-baba yurdlarından didərgin salınan insanlar öz yurdlarına qayıdırlar”, - deyə A.Məmmədov fikirlərini yekunlaşdırıb.
Bölmənin digər xəbərləri
