Deputat: Xocalı qətliamı faşizmin Ermənistanın dövlət siyasəti olduğunu göstərdi
Bakı, 24 fevral, AZƏRTAC
Ermənilərin istəyi təkcə ərazi iddiası deyildi. Düşmən soyqırımı törətməklə bir xalqı yer üzündən silmək kimi məkrli niyyətini gerçəkləşdirmək istəyirdi. İşğalçı xalqımıza qarşı bu kin-küdurəti, nifrəti heç nədən çəkinmədən Xocalıda beynəlxalq aləmə nümayiş etdirdi.
Şairlər, yazıçılar, bir sözlə, ədəbiyyat adamları dünyanın ən humanist insanları kateqoriyasına aid edilir. Biz görmüşük ki, bu zümrənin nümayəndələri milli mənsubiyyətindən, dini etiqadından asılı olmayaraq insan amilini hər şeydən üstün tutur, sülh elçisi kimi bəşəriyyətə töhfələrini əsirgəmirlər. Amma ermənilərin Zori Balayan adlı bir yazıçısı var. Bu qatil əlinə silah alaraq Xocalı qətliamında şəxsən iştirak edib. Soydaşlarımızı öldürüb, meyitləri təhqir edib. Bununla kifayətlənməyən bu qatil cinayətkar ordunun murdar ayağı palçığa batmasın deyə, öldürülən soydaşlarımızın meyitlərindən körpü düzəldib.
Bu xalqın ədəbiyyat adamı, yazıçısı bu xislətdədirsə, görün, hər hansı bir sıravi vətəndaşı hansı vəhşi düşüncə sahibidir. Barbarlıq, terror əməlləri, öz xalqına olan sevgisini digər xalqa qarşı nifrət əsasında qurmaq kimi qeyri-insani keyfiyyətlər Ermənistanın dövlət siyasətinin ana xəttidir.
AZƏRTAC xəbər verir ki, bu fikirləri Milli Məclisin deputatı, YAP İdarə Heyətinin üzvü Rəşad Mahmudov söyləyib.
Deputat qeyd edib ki, keçmiş sovet ordusunun Xankəndi şəhərində yerləşən 366-cı motoatıcı alayının şəxsi heyəti ilə birlikdə ən müasir hərbi texnika ilə təchiz edilən düşmən hərbi birləşməsi 1992-ci il fevralın 25-dən 26-na keçən gecə azərbaycanlılara qarşı etnik təmizləmə siyasətinin tərkib hissəsi kimi Xocalı şəhərinə hücum edərək misli görünməmiş qırğın törətdi. Ermənistanın sabiq prezidenti Serj Sarkisyanın bununla bağlı xarici mətbuata verdiyi açıqlama isə törədilən qətliamın etirafı idi: “Xocalıya qədər azərbaycanlılar elə düşünürdülər ki, bizimlə zarafat etmək olar. Onlara elə gəlirdi ki, ermənilər mülki əhaliyə əl qaldıra bilməzlər. Biz bu stereotipi qırmalı idik. Belə də oldu…”.
Xocalı soyqırımı nəticəsində 613 Xocalı sakini qətlə yetirildi, 8 ailə tamamilə məhv edildi, 1275 nəfər əsir götürüldü. Əsir götürülən 150 soydaşımızın, 68 qadın və 26 uşağın taleyi bu günədək məlum deyil. Əsrin ən böyük faciəsini biz azərbaycanlılar dünyanın gözü önündə yaşadıq. Beynəlxalq aləm isə bu vəhşiliyə susdu. Hadisədən uzun bir vaxt keçməsinə baxmayaraq, Azərbaycan dövləti və xalqımız bu dəhşətli hadisəni unutmur, Xocalı qurbanlarının əziz xatirəsini qədirbilənliklə anır, faciənin dünya çapında tanıdılması istiqamətində məqsədyönlü addımlar atır.
Xocalı qətliamının qlobal arenada tanıdılması, ona hüquqi qiymət verilməsi əsası ulu öndər Heydər Əliyev tərəfindən qoyulan Azərbaycanın xarici siyasətinin mühüm xətlərindən biridir.
Xalqımızın ümummilli lideri tərəfindən başlanan beynəlxalq təbliğat-təşviqat prosesi dövlətimizin başçısı cənab İlham Əliyevin də prezidentlik fəaliyyəti dövründə siyasətinin əsas prioritetlərindən biri olub.
Prezident İlham Əliyevin davamlı olaraq Xocalı qətliamı haqqında ölkə daxilində, mötəbər beynəlxalq tribunalarda etdiyi çıxışlar ermənilərin faşist xislətinin ifşa olunması və faciənin tanıdılması istiqamətində atılan mühüm addımlar kimi önəm daşıyır. Dövlətimizin başçısı çıxışlarının birində qeyd edib: “1994-cü ildən ümummilli lider Heydər Əliyevin təşəbbüsü ilə Azərbaycan hökuməti və parlamenti erməni millətçilərinin azərbaycanlılara qarşı törətdiyi cinayətlər, o cümlədən Xocalı soyqırımı haqqında həqiqətləri bütün miqyası və dəhşətləri ilə dünya dövlətlərinə və beynəlxalq ictimaiyyətə çatdırmaq, bunların soyqırımı siyasəti kimi tanınmasına nail olmaq üçün inadlı və ardıcıl fəaliyyət göstərir. Məqsəd Xocalı faciəsinə beynəlxalq hüquqi-siyasi qiymət verilməsinə, onun təşkilatçılarının, ideoloqlarının və icraçılarının dünya ictimaiyyətinin gözündə ifşasına və cəzalandırılmasına nail olmaqdır. Bu, bir tərəfdən Xocalı müdafiəçilərinin və şəhidlərinin ruhu qarşısında bizim insanlıq və vətəndaşlıq borcumuzdur. Digər tərəfdən isə insanlığa qarşı yönəlmiş bu cür qəddar cinayətlərin gələcəkdə təkrar olunmaması üçün mühüm şərtdir”.
Yeri gəlmişkən, 2008-ci ildə Heydər Əliyev Fondunun vitse-prezidenti Leyla xanım Əliyevanın təşəbbüsü və müəllifliyi ilə “Xocalıya ədalət” beynəlxalq kampaniya soyqırımı aktının dünyada tanıdılması istiqamətində mühüm rol oynayıb. Kampaniya çərçivəsində dünya ictimaiyyəti məlumatlandırılaraq, Xocalı həqiqətləri qlobal müstəvidə tanıdılıb, insanlığın düşməni olan erməni faşizminin iç üzü açılıb.
Deputat sonda bildirib ki, şanlı Vətən savaşında da Gəncənin və digər şəhərlərimizin Ermənistan silahlı qüvvələri tərəfindən hədəf götürülməsi, mülki şəxslərin məqsədli şəkildə öldürülməsi, dağıntılar düşmən ölkənin əsl mahiyyətini ortaya qoydu. Faşist düşüncəsi ilə yaşayan Ermənistan üçün heç bir dəyərin olmaması göz önündədir.
İkinci Qarabağ müharibəsində dünya ictimaiyyəti Azərbaycanın ədalətə, haqqa əsaslanan tarixi zəfərinin şahidi oldu. Müzəffər ordumuz tərəfindən dinc sakinlər hədəf götürülmədi, əksinə, əcdadlarımızın bizə miras qoyduğu humanizm prinsiplərinə sadiqlik nümayiş etdirildi.
Bununla Azərbaycan dünyaya savaş mədəniyyəti, müharibə şəraitində belə insanlıq normalarının gözlənilməsinin mümkünlüyünü göstərdi. Eyni zamanda dünya Ermənistanın faşizm mahiyyəti ilə Azərbaycanın ədalət mübarizəsinin fərqini gördü.
Bölmənin digər xəbərləri
